
第一世噶玛巴教言集1KM33རྡོ་རྗེ་རྣལ་འབྱོར་མའི་སྡིག་པ་སྦྱོང་བའི་ཆོ་ག
1-2-233a
༄༅། །རྡོ་རྗེ་རྣལ་འབྱོར་མའི་སྡིག་པ་སྦྱོང་བའི་ཆོ་ག
༄། །དཔལ་ལྡན་དྷརྨ་ཀཱིརྟིའི་སྙན་རྒྱུད།
༈ བྷི་དྷརྨ་ཀཱིརྟི་ན་མོ། རྡོ་རྗེ་རྣལ་འབྱོར་མའི་བསྙེན་པ་སྔོན་དུ་སོང་བ་གཅིག་གིས། ཞི་བའི་སྦྱིན་སྲེག་ཅི་རིགས་པར་བྱའོ། །སྤྱིར་བསྙེན་པ་ལ་གསུམ་ལས། དང་པོ་ནི། རང་ཉིད་སངས་རྒྱས་སུ་གྱུར་ཏེ། བྱང་ཆུབ་སེམས་དཔའ་ཚོ་ལ་ཆོས་སྟོན་པའམ། ལྷན་ཅིག་སྐྱེས་པའི་ཡེ་ཤེས་རྒྱུད་ལ་སྐྱེས་པའམ། རྣལ་འབྱོར་མའི་ཞལ་གཡུང་དྲུང་དང་བཅས་པ་སྟེ་གསུམ་མཚན་མའོ། །གྲངས་ནི། རབ་འབུམ་ཚོ་བརྒྱད། འབྲིང་ཉི་ཤུ་རྩ་གཅིག །ཐ་མ་བཅུ་གཅིག་གོ །དུས་ནི། རབ་ཟླ་བ་གཅིག འབྲིང་ཕྱེད། ཐ་མ་ཞག་བདུན་ནོ། །དེ་ལ་དང་པོ་གཉིས་ཡང་དགོས་སོ། །དེ་ནས་བསྒྲུབ་པ་ནི། གནས་མཚན་ཉིད་དང་ལྡན་པར་ཁང་པ་བརྒྱན་ཅིང་ས་བདར་ནས། བའི་རྣམ་ལྔ་དྲི་དང་བདུད་རྩི་ལ་སོགས་པ་བྱུགས་ཏེ། བླ་མའི་མཎྜལ་དང་། དཀོན་མཆོག་གི་མཎྜལ་དང་། སིནྡྷུ་རའི་མཎྜལ་གསུམ་ཇི་ལྟ་བ་བཞིན་བྱས་ལ། 
1-2-233b
ཁྱད་པར་དུ་གོ་རོ་ཙ་ནའི་དཀྱིལ་འཁོར་ནི། དང་པོ་རེ་ཁ་བཟླུམ་པོའི་ནང་དུ། སྐྱ་རིས་བྱས་ལ། དེའི་རྗེས་སུ་ཆང་དང་ཙན་དན་དམར་པོའི་ཁུ་བ་ལ་རང་གི་མེ་ཏོག་དང་། གོ་རོ་ཙ་ན་དང་མཚལ་དཀར་གསུམ་སྦྱར་བས། པདྨ་འདབ་བཞིའི་ལྟེ་བར་གཡོན་པའི་སྲིན་ལག་གིས་ཆོས་འབྱུང་གྲུ་གསུམ་པ་གཅིག་བྲི། དེའི་དབུས་སུ་མེ་ཏོག་གི་ཚོམ་བུ་གཅིག་དགོད། མོ་ཐོད་མཚན་ལྡན་གཅིག་གི་ནང་དུ། རྫས་རྣམས་ཀྱི་ཆོས་འབྱུང་གྲུ་གསུམ་པའི་ནང་དུ་པདྨ་འདབ་བཞིའི་ལྟེ་བར་བཾ། འདབ་མ་བཞི་ལ་ཡི་གེ་བཞི་དང་བཅས་པ་བྲིས་ལ། དཀྱིལ་འཁོར་དབུས་སུ་སྟེགས་ལ་བཞག ། དེ་ལ་པཱུ་ཛ་ལྔ་ཚན་ལྔས་བསྐོར། གཞན་ཡང་བླ་མ་དང་དཀོན་མཆོག་སྤྱིའི་མཆོད་པ་འབྱོར་ཚད་དང་། ཁྱད་པར་དུ་རང་གི་མདུན་དུ་ཆང་གི་ཡོན་ཆབ་ཀྱིས་སྣ་དྲངས་པའི་མཆོད་པ་ལྔ་དང་། རྡོ་རྗེ་དྲིལ་བུ་དང་། ཌཱ་མ་རུ་དང་། ལག་མཆོད་ཀྱི་རྒྱུ་ཐོད་པ་མཚན་ལྡན་ཆང་གིས་བཀང་བ་དང་། ཚོགས་དང་གཏོར་མ་དང་། བཟེད་ཞལ་ཡང་བཤམ་མོ། །དེ་ནས་རྣལ་འབྱོར་པ་ཨུ་རྒྱན་དུ་ལྟས་ལ་བྱང་ཆུབ་ཀྱི་སེམས་སྔོན་དུ་འགྲོ་བས་བླ་མ་དང་དཀོན་མཆོག་གི་མཎྜལ་སྤྱིའི་མཆོད་པ་དབུལ་ལ་གསོལ་བ་གདབ་ལ། རང་རྣལ་འབྱོར་མའི་བསྐྱེད་རྫོགས་བསྒོམ་ཞིང་བཟླས་པ་ཅི་གྲུབ་བྱ། སིནྡྷུ་ར་ཡང་བྱིན་རླབས་ལྟར་བསྒྲུབ་ལ། དེ་བརྟན་པའི་བཟླས་པ་ཅི་གྲུབ་བྱ། ཆང་བྱིན་གྱིས་བརླབས་ཏེ་
1-2-234a
༄༅། །ལག་པ་གཡས་སུ་བཟུང་ལ། གཡོན་པའི་མཐེབ་སྲིན་གྱིས་རང་གི་སྤྱི་གཙུག་ཏུ་པདྨ་དཀར་པོ་འདབ་མ་བརྒྱད་པའི་ལྟེ་བ་ལ། དུས་གསུམ་གྱི་སངས་རྒྱས་ཐམས་ཅད་དང་ཐ་མི་དད་པའི་བླ་མ་རྒྱུད་ལུང་ལེན་པའི་རྒྱུད་ཐམས་ཅད་ཀྱི་གཙོ་བོ་རྩ་བའི་བླ་མ་སྐུ་དོག་དཀར་ལ་འཚེར་བ་བཀྲག་དང་གཟི་བརྗིད་ཕུན་སུམ་ཚོགས་པ་སྣུམ་ཞིང་འཛུམ་པའི་མདངས་དང་ལྡན་པ། སྣང་སྲིད་ཐམས་ཅད་ལ་དབང་བསྐུར་བ༑ ཐབས་ཤེས་རབ་ཕྱག་གཉིས་རྡོ་རྗེ་དང་དྲིལ་བུ་ཐུགས་ཀར་བསྣོལ་བ། བསྒོམས་པ་ལ་མཆོད་པས། ཟག་པ་མེད་པའི་ཡེ་ཤེས་ཀྱི་སྐུ་ཉམས་སུ་གཏར་བར་བསམ། ཡང་ཕྱིའི་མཆོད་པ་ལྔ་དང་། ནང་གི་མཆོད་པ། རང་གི་ཐུགས་ཀ་ནས་ཡེ་ཤེས་ཀྱི་ཌཱ་ཀི་བཞིས་ཤ་ལྔ་བདུད་རྩིས་མཆོད། མཎྜལ་ཕུལ། བསྟོད་པ་བྱས་ལ། གསོལ་བ་གདབ་པ་ནི། བླ་མ་རྡོ་རྗེ་འཛིན་པ་ཆེན་པོ་རྣམས་དགོངས་སུ་གསོལ། བདག་རྡོ་རྗེ་འཛིན་པ་མིང་འདི་ཞེས་བྱ་བའི་ལུས་ངག་ཡིད་གསུམ་བྱིན་གྱིས་རླབས་པ་ཆེན་པོ་མཛད་དུ་གསོལ། སྐུ་གསུང་ཐུགས་ཀྱི་དངོས་གྲུབ་བདག་ལ་སྩལ་དུ་གསོལ། མས་དང་རྟོགས་པ་ཁྱད་པར་ཅན་རྒྱུད་ལ་སྐྱེ་བར་མཛད་དུ་གསོལ། ཕྱི་ནང་གི་བར་ཆད་ཐམས་ཅད་ཞི་བར་མཛད་དུ་གསོལ། ཅི་བསམ་པའི་དོན་ཐམས་ཅད་ཡིད་བཞིན་དུ་འགྲུབ་པར་མཛད་དུ་གསོལ། ཞེས་ལན་གསུམ་བརྗོད་པས། བླ་མ་རྡོ་རྗེ་རྣལ་
1-2-234b
འབྱོར་མའི་རྣམ་པར་གྱུར་ནས་བདག་གི་ཚངས་བུག་ཏུ་ཐིམ་པས། ལུས་ངག་ཡིད་གསུམ་བྱིན་གྱིས་བརླབས་པར་བསམ་མོ། །དེའི་རྗེས་ལ་གོ་རོ་ཙ་ནའི་ཐོད་པ་དེ་ཨུ་རྒྱན་དུ་མོས་ལ། ངག་ཏུ། ཨོཾ་བཛྲ་བཻ་རོ་ཙ་ནི་ཡེ་ཧཱུྃ་ཕཊ་སྭཱ་ཧཱ། ཞེས་ལན་གསུམ་བརྗོད་ཅིང་། སྔར་གྱི་བྱིན་གྱིས་བརླབས་པའི་བདུད་རྩིའི་ཐོད་པའི་ནང་དུ་གཏོར་བས། བཾ་ལས་འོད་ཟེར་ཕྱོགས་བཅུར་འཕྲོས་པས། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས་རྣལ་འབྱོར་མར་གྱུར། ཚུར་བཾ་ལ་ཐིམ་པ་ཙམ་གྱིས་རྣལ་འབྱོར་མ་པདྨ་ཉི་མའི་གདན་ལ་བཞུགས་པ། ལྟེ་བར་མཁའ་འགྲོ་མ་བཞི་དང་བཅས་པ་གཅིག་བསྐྱེད་ལ་དམིགས་ཏེ། ངག་ཏུ། ཨོཾ་བཛྲ་བཻ་རོ་ཙ་ནི་ཡེ་ཧ་རི་ནི་ས་ཧཱུྃ་ཕཊ་སྭཱ་ཧཱ། ཞེས་ཅི་ནུས་བཟླས། མཆོད་པ་དང་བསྟོད་པ་བྱས་ལ། གསོལ་བ་གདབ་པ་ནི། དུས་གསུམ་གྱི་སངས་རྒྱས་ཐམས་ཅད་བསྐྱེད་པར་བྱེད་པའི་ཡུམ། དཔལ་རྡོ་རྗེ་རྣལ་འབྱོར་མས། བདག་རྡོ་རྗེ་འཛིན་པ་མིང་འདི་ཞེས་བགྱི་བའི་ལུས་ངག་ཡིད་གསུམ་བྱིན་གྱིས་བརླབ་པ་མཛད་དུ་གསོལ། །སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། །ཏིང་ངེ་འཛིན་ཁྱད་པར་ཅན་རྒྱུད་ལ་སྐྱེ་བར་མཛད་དུ་གསོལ། །ཕྱི་དང་ནང་གི་འགལ་རྐྱེན་ཐམས་ཅད་ཞི་བར་མཛད་དུ་གསོལ། ཅི་བསམ་པའི་དོན་ཐམས་ཅད་ཡིད་བཞིན་དུ་འགྲུབ་པར་མཛད་དུ་གསོལ། ཁྱད་པར་དུ་དཔལ་རྡོ་རྗེ་རྣལ་འབྱོར་མའི་ཞལ་མྱུར་དུ་
1-2-235a
༄༅། །མཐོང་ནས་ཚེ་འདི་ཉིད་ལ་མཆོག་དང་ཐུན་མོང་གི་དངོས་གྲུབ་ཐམས་ཅད་ཐོབ་པར་མཛད་དུ་གསོལ། །ཞེས་ལན་བདུན་བརྗོད་དོ། །དེ་ནས་ལག་པ་གཡས་སུ་ཤ་ཆེན་དང་གུ་གུལ་ནག་པོའི་སྤོས་བཟུང་༑ གཡོན་དྲིལ་བུ་བསིལ་ཞིང་། ཧཱུྃ་མ་ལུས་སེམས་ཅན་ཀུན་གྱི་མགོན་གྱུར་ཅིང་། །ཞེས་པའི་ཚིག་བརྗོད་པས། རང་མེ་ལོང་ལྷའི་ཐུགས་ཀ་ནས་འོད་ཟེར་འཕྲོས་པས། གོ་རོ་ཙ་ནའི་རྗེ་བཙུན་མ་ལ་ཕོག་པས༑ དེ་ཚུར་བྱོན་ནས་སིན་དྷུ་རའི་རྗེ་བཙུན་མ་ལ་ཐིམ་པས་དབྱེར་མེད་པར་བསམ་ལ། བྱིན་གྱིས་བརླབས་པའི་བདུད་རྩི་དེས་གནས་ཁང་ལ་གཏོར་བས་བསྲུང་། མཆོད་གཏོར་དང་ཚོགས་ལ་གཏོར་བས་བྱིན་གྱིས་བརླབས་ནས། དང་པོ་ཆང་དང་མཆོད་པ་ལྔ་འབུལ། དེའི་རྗེས་སུ་ཚོགས་དང་གཏོར་མ་ཡང་དབུལ་ཞིང་། བསྟོད་པ་བྱ། གསོལ་བ་གདབ། བཟོད་པར་གསོལ། ཀ་པཱ་ལའི་ནང་དུ་ཡེ་ཤེས་གཤེགས། དམ་ཚིག་པ་རང་གི་ལྟེ་བར་བསྡུ། དེ་ནས་ཀ་པཱ་ལ་རང་གི་མདུན་དུ་གདན་སྟེང་དུ་སྤྱན་དྲངས་ཏེ། མཆོད་པ་དང་བསྟོད་པ་ཕུལ་ནས་ཡེ་ཤེས་པ་བདུད་རྩིའི་རང་བཞིན་དུ་ཞུ་བར་བསམ། ལག་པ་གཙང་མས་ཐོད་པའི་ཆོས་འབྱུང་ཡི་གེ་དང་བཅས་པ་བཀྲུགས་ལ། སྣོད་གཙང་མར་བླུགས་ནས། དངོས་གྲུབ་ཀུན་གྱི་རྟེན་དུ་རྣལ་འབྱོར་པ་རང་གིས་ལོངས་སྤྱོད་དོ། །རང་དང་བླ་མ་དང་ལྟ་བ་དང་སྤྱོད་པ་བསྒོམ་པ་མཐུན་པའི་
1-2-235b
གྲོགས་གཉིས་སམ་གསུམ་གྱིས་ལྷན་ཅིག་ཏུ་བསྒྲུབ། ཐུན་བཞིའམ་དྲུག་ཏུ་བྱ། ནུབ་རེ་ལ་ཚོགས་ཆུང་རེ་བྱ། ཞག་བདུན་བདུན་ན་མཎྜལ་དང་པཱུ་ཛ་རེ་རེ་བརྗེའོ། །དེས་ཞལ་མངོན་སུམ་དུ་མཐོང་བའམ། ཏིང་ངེ་འཛིན་ཁྱད་པར་ཅན་སྐྱེ་བའམ། བོགས་ཐོན་པ་དང་། བུ་མོ་གཞོན་ནུ་མ་རྒྱན་ཅན་དག་གིས་གླུ་ལེན་པའམ། ཌཱ་མ་རུ་ལ་སོགས་པའི་སྒྲ་སྒྲོག་པ་དང་། མེ་ཏོག་འཐོར་བ་རྨི་སྟེ། དེ་དག་ལ་དགའ་བའི་རྟོག་པ་མི་བྱ། ཡང་བུད་མེད་ནག་མོ་གོས་ནག་པོ་གོན་པའམ། ཞྭ་ནག་གོན་པ་དུ་བ་ལ་སོགས་པ་རྨིས་ན། དེ་ཡང་རང་བཞིན་མེད་པར་ཤེས་པར་བྱས་ལ། བླ་མ་དང་མཁའ་འགྲོ་ལ་གསོལ་བ་གདབ་ཅིང་། བཟླས་པ་ལ་བརྩོན་པ་ཉིད་ཀྱིས་ཞི་བར་འགྱུར་རོ་ནུབ་ཐ་མ་ལ་ཞི་བའི་ཧོམ་ཁུང་གཅིག་བྱས་ལ་ནང་ན་ཚུར་སྤྱན་དྲངས། །གལ་ཏེ་སྤོགས་པར་འདོད་ན་རྣལ་འབྱོར་མའི་བྱིན་རླབས་རང་ལ་དབབ་པར་བྱ་སྟེ་དེ་ཡང་སིན་དྷུ་ར་མི་བསྡུ་གསོལ་བ་གདབ་པ་ཡན་ཆད་མཐུན། ལྷ་མོ་ཀ་པཱ་ལ་གསུམ་པར་རང་དང་ལྷ་མོའི་ཐུགས་ཀ་ནས་འོད་ཟེར་འཕྲོས་པས། ཨུ་རྒྱན་ནས་མཁའ་འགྲོ་མ་དཔག་ཏུ་མེད་པ་སྤྱན་དྲངས་ལ་མདུན་གྱི་ལྷ་མོ་ལ་དབྱེར་མེད་པར་བསྟིམ། དེ་མདུན་གྱི་ནམ་མཁའ་ལ་གར་བསྒྱུར་ཞིང་ཞལ་བསྟན་པར་བསམ་ལ། མཆོད་པ་དང་བསྟོད་པ་དབུལ་ཞིང་གསོལ་བ་གདབ་ལ། དེ་ནས་ལུས་རྡོ་རྗེ་སྐྱིལ་ཀྲུང་བཅའ། ལག་པ་གཉིས་ཐལ་མོ་སྦྱར་རམ། མཉམ་བཞག་བྱས་ལ། རྣལ་འབྱོར་མའི་ཏིང་
1-2-236a
༄༅། །ངེ་འཛིན་དུ་ཞུགས་ནས། ངག་གི་དང་པོ་འོག་རླུང་དྲང་། དེ་ནས་སྟེང་རླུང་མནན་ལ། སེམས་ཀྱིས། བདག་གི་སྤྱི་བོའི་སྟེང་དུ་བླ་མ། ལྟེ་བར་རྣལ་འབྱོར་མ་སོམས། བླ་མའི་ལྟེ་བར་བཾ་ཡིག་དམར་པོ་གཅིག་སོམས། དེ་ལས་འོད་ཟེར་བྱུང་བས། བདག་གི་ལྟེ་བའི་ཕག་མོ་ལ་ཕོག་པས། དེ་ལས་ཀྱང་འོད་ཟེར་འཕྲོས་པས། བདག་རང་གི་སྤྱི་བོའི་གཙུག་ནས། རྐང་པའི་མཐིལ་ཡན་ཆད་དཀར་ལྷང་གིས་ཁེངས་པར་བསམ་ཞིང་ངག་ཏུ། ཨོཾ་བཛྲ་བཻ་རོ་ཙ་ནི་ཡེ་ཧཱུཾ་ཕཊ། ཨོཾ་བཛྲ་བ་རཱ་ཧི་ཨ་བེ་ཤ་ཡ་ཨ་བེ་ཤ་ཡ་ཨ་ཨ། ཞེས་བརྗོད་ཅིང་། ཏིང་ངེ་འཛིན་གྱི་སྤྲོ་བསྡུ་ཡང་དང་ཡང་དུ་བྱས་པས་མྱུར་དུ་འགྲུབ་པ་ཡིན་ནོ། །གསུང་ངོ་།། །།ཨོཾ་སྭ་སྟི་སིདྷཾ། དཔལ་རྡོ་རྗེ་རྣལ་འབྱོར་མ་ལ་གནས་པས། གནས་ཁྱད་པར་ཅན་དུ་རྡུལ་ཚོན་གྱི་དཀྱིལ་འཁོར་པད་མ་དམར་པོ་འདབ་མ་བཞི་པའམ། བརྒྱད་པ་གང་རུང་གི་མཐར་མེ་རིས་བསྐོར་མན་ངག་བཞིན་དུ་བཞེངས་ལ། རིན་པོ་ཆེའི་བུམ་པ་མཚན་ཉིད་དང་ལྡན་པ་དང་། རྫས་ཆུ་དང་བཅས་པས་གུ་གུལ་གྱིས་འདུག །ཡུངས་ཀར་གྱིས་བྲབ་བགེགས་བསྐྲད་ནས། སྙིང་པོ་ལྔ་དང་དྲི་ལྔ་དང་སྨན་ལྔ་དང་འབྲུ་ལྔ་དང་རིན་པོ་ཆེ་ལྔ་དང་བདུད་རྩི་ལྔ་བླུག་སྟེ། ཆུས་དགང་སྟེ། འབྲས་བུ་ཅན་གྱི་ཤིང་གིས་ཁ་རྒྱན་དང་མགུལ་ཆིངས་སྲོག་ལྔ་པ་ཀྱིས་མཛེས་པར་བྱས་ལ། དཀྱིལ་འཁོར་གྱི་དབུས་སུ་མེ་ཏོག་ཚོམ་བུའི་སྟེང་དུ་བཞག །མཆོད་པ་ལྔ་དང་གཏོར་མ་གསུམ་བཤམ། དེ་ནས་གཞུང་བཞིན་དུ་བསྐྱེད་པ་རྫོགས། བུམ་པ་དང་མཎྜལ་མི་དམིགས་པ་ལས། 
1-2-236b
མཎྜལ་ཧཱུྃ་ལས་རྡོ་རྗེའི་ཁང་པ་ཀུན་ནས་བཟླུམ་ཞིང་འོད་འཕྲོ་བ་རྣམ་པར་དག་པའི་གཞལ་ཡས་ཁང་པད་མའི་གདན་དང་བཅས་པ་བསྐྱེད། དེའི་དབུས་སུ་བུམ་པ་བྷྲུྃ་ལས་བྱུང་བའི་རིན་པོ་ཆེའི་བུམ་པའི་ནང་དུ་ཆུ་བདུད་རྩིའི་རྒྱ་མཚོ་དང་པད་མའི་སྡོང་བོའི་ལྟེ་བ་ལ་ཉི་མའི་དབུས་སུ་བཾ་གི་འཕྲོ་འདུ་ལས་རྣལ་འབྱོར་མར་བསྐྱེད་ཅིང་། དེ་ལས་འོད་ཟེར་འཕྲོས་པས། རང་བཞིན་གྱི་གནས་ནས་ཡེ་ཤེས་ཀྱི་ཆུ་རྒྱུན་ཟགས་པས་བུམ་པའི་རྣལ་འབྱོར་མའི་སྤྱི་གཙུག་ཏུ་ཞུགས་ཤིང་གཉིས་སུ་མེད་པར་གྱུར། དེ་ལས་ཀྱང་བདུད་རྩི་བབ་པས་བུམ་པ་ཟག་པ་མེད་པའི་བདུད་རྩིས་གང་བར་བསམ་ཞིང་། དང་པོ་ཨོཾ་ཨཱཿཧཱུཾ་ཞེས་གསུམ་དང་རྣལ་འབྱོར་མའི་སྙིང་པོ་མང་དུ་བཟླས་ལ། མཆོད་པ་ལྔ་དང་ཐུན་མཚམས་སུ། ཡོད་ན་ཚོགས་རེ་བྱ། མེད་ན་གཏོར་མ་གཅིག་རྣལ་འབྱོར་མ་ལ་འབུལ། གཅིག་ཆོས་སྐྱོང་ཐམས་ཅད་ལ། གཅིག་གནོད་བྱེད་དང་གཞི་བདག་ལ་བྱིན་ནས། རྣལ་འབྱོར་མའང་བདུད་རྩིར་ཞུ་བར་བསམ་ཞིང་། བདག་གམ། གཞན་གྱི་དམ་ཚིག་ཆག་ཉམས་ཐམས་ཅད་དང་། ལུས་ངག་ཡིད་གསུམ་གྱི་སྡིག་སྒྲིབ་དང་། རྐྱེན་དང་བར་ཆོད་དང་མི་གཙང་བ་ལ་སོགས་པ་ཐམས་ཅད་བཀྲུས་པར་བསམ་ཞིང་ཁྲུས་བྱ། རྡུལ་ཚོན་བསྡུས་ནས་ཆུར་དོར་རོ། །ཨྠྀི།། །།རྣལ་འབྱོར་མའི་ཏིང་ངེ་འཛིན་དང་ལྡན་པས། སྣ་བུག་གཉིས་ནས་རླུང་ཕྱིར་བྱུང་པས། 
1-2-237a
༄༅། །མདུན་གྱི་ནམ་མཁར་རྒྱུའི་ངོ་བོ་ཚེ་དཔག་མེད་སྐུ་མདོག་དམར་པོ་མཉམ་བཞག་གི་ཕྱག་རྒྱ་མཛད་པའི་དབུས། ལྷུང་བཟེད་ཚེ་དང་ཡེ་ཤེས་དཔག་ཏུ་མེད་པས་གང་བ་བསྣམས་པའི་མཐེབ་གང་ཙམ་གཅིག་སྤྱན་དྲངས་ཏེ་བཞུགས་པ་ལ། བདག་དང་སེམས་ཅན་ཀྱི་ཚེ་བསྲིང་བར་མཛད་དུ་གསོལ། ཚེ་སྲོག་གི་བར་ཆད་ཐམས་ཅད་ཞི་བར་མཛད་དུ་གསོལ། སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། ཞེས་བྱ་བས་གུ་རུའི་ཐུགས་ཀ་ནས་འོད་ཟེར་རང་བཞིན་གྱི་གནས་ནས་སྤྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། དཔའ་བོ་དང་ཊཱ་ཀི་ཐམས་ཅད་ཐུགས་གཉིས་སུ་མེད་པའི་ཡེ་ཤེས་ཀྱི་བྱང་སེམས་དཀར་དམར་གྱི་རྣམ་པར་སྤྱན་དྲངས་ཏེ། རྒྱུའི་ཕྱག་གི་ལྷུང་བཟེད་དུ་བྱོན་པས། རླུང་གང་ནས་རྒྱུ་བའི་ངོས་ནས་ཧཱུྃ་ལྟ་བུའི་རླུང་བྱུང་པས་ལྷུང་བཟེད་ཀྱི་ནང་ནས་ཆེའི་རང་བཞིན་བདུད་རྩི་ལྟ་བུ་དེ་དཀར་ནར་གྱིས་སྤྱན་དྲངས་ཏེ། རླུང་ནང་དུ་འཇུག་པ་དང་བསྟུན་ནས་སྣ་བུག་གཡོན་ནས་ཞུགས་ཏེ། རང་གི་སྙིང་ཤིན་ཏུ་རིད་པ་ལ་ཐིམ་པས་སྦལ་སྦལ་རྒྱས་པར་བསམ། དེ་བཞིན་དུ་སེམས་ཅན་ཐམས་ཅད་ཀྱང་དེ་ལྟར་བསམ་མོ། །དེ་ནི་གནས་སྐབས་ཚེ་དང་ཤེས་རབ་འཕེལ། ལུས་ཟུངས་འཕེལ་བས་བཀྲག་དང་སྟོབས་རྒྱས། མཐར་ཐུག་སེམས་ཉིད་གཏན་ལ་ཕབ་ནས་མཆོག་གི་དངོས་གྲུབ་ཐོབ་བོ། །ཨྠྀི།། །།
1-2-237b
༄། །རྣལ་འབྱོར་མའི་བསམ་གཏན་ཉམས་སུ་ལེན་པ།
ཨོཾ་སྭ་སྟི་སིདྡྷཾ། རྣལ་འབྱོར་མའི་བསམ་གཏན་ཉམས་སུ་ལེན་པར་འདོད་པས། ཐོག་མར་སེམས་ཅན་ཐམས་ཅད་བདག་གི་མ་ཡིན་ཞིང་། མ་ཐམས་ཅད་བདག་ལ་དྲིན་རེ་ཆེ་བས་མ་འདི་རྣམས་འཁོར་བསྡུག་བསྔལ་བའི་རྦ་རླབས་འཁྲུག་པའི་རྒྱ་མཚོ་ཆེན་པོ་རབ་ཏུ་གཡེངས་པ། འཁོར་བ་མུ་མཐའ་མེད་པ་དེ་ལས་འདོན་པའི་མཁན་པོ་ནི་བདག་ཁོ་ན་ལ་ཐུག་ཅིང་། བདག་ཉིད་ཀྱང་དེ་ལྟ་བུ་ལས་མ་འདས་པས། དང་པོ་བདག་གིས་མ་རྣམས་ཀྱི་དོན་དུ། དཔལ་རྡོ་རྗེ་རྣལ་འབྱོར་མ་བསྒོམ་ཞིང་། དེ་ཐོབ་པའི་སྐད་ཅིག་མ་ལ་སེམས་ཅན་རྣམས་ཀྱང་དེ་ལས་ཀྱང་བསྒྲལ་ནས་རྣལ་འབྱོར་མའི་གོ་འཕང་ལ་བཀོད་པར་བྱའོ་སྙམ་དུ་བསམ་པར་བྱའོ། །དེ་ནས་བདག་ཉིད་ཐ་མལ་དུ་གནས་པའི་སྙིང་ཀའི་ཞབས་སུ་ཀཾ་ནག་པོ་གཅིག་བསམ། སྙིང་གི་སྟེང་དུ་བཾ་དཀར་པོ་གཅིག་བསམ། དེ་ནས་ཀཾ་འོད་ཟེར་ལུས་དང་ཕྱོགས་ཐམས་ཅད་དུ་ཁྱབ་པར་འཕྲོས་པས། བདག་དང་སེམས་ཅན་ཐམས་ཅད་ཀྱི་ལས་དང་ཉོན་མོངས་པ་དང་ཤེས་བྱའི་སྒྲིབ་པ་དང་། འཕྲལ་རྐྱེན་གྱི་ཉམས་གྲིབ་ཐམས་ཅད་བསྡུས་ཏེ་ཀཾ་ལ་ཐིམ་ཞིང་། དེ་གྱུར་པ་ལས་མི་ནག་པོ་གཅིག་བསམ། བཾ་ལས་འོད་ཟེར་ཕྱོགས་ཐམས་ཅད་དུ་འཕྲོས་པས། བདག་དང་སེམས་ཅན་ཐམས་ཅད་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བསོད་ནམས་དང་ཡེ་ཤེས་ཀྱི་ཚོགས་དང་། 
1-2-238a
༄༅། །ཡོན་ཏན་ཕྲིན་ལས་ཅི་བསམ་པ་ཐམས་ཅད་འདུས་ནས་བཾ་ལ་ཐིམ་ཞིང་ཡོངས་སུ་གྱུར་པ་ལས། རྣལ་འབྱོར་མ་དཀར་མོ་སྨད་ཕུར་པ་ཟུར་གསུམ་པ་གཅིག་ཏུ་བསམ་ལ། སྟེང་འོག་རླུང་བསྡམས་ལ་ཕུར་པ་ནག་པོའི་སྤྱི་གཙུག་རྒྱབ་པས་རྐང་མཐིལ་དུ་དལ་གྱི་སོང་བས་སྡིག་པ་དང་ཉམས་སྒྲིབ་མ་ལུས་པ་དང་བཅས་པ་རྐང་མཐིལ་གཉིས་ན་མར་དུད་ཁུའི་རྣམ་པ་ལྟར་མར་ནག་ནུར་གྱིས་བུད་ནས་ས་གཞི་སེར་པོ་ལ་ཐུག་པར་བསམ། དེ་ནས་རང་ལུས་རྣལ་འབྱོར་མ་ལ་བསྡུ་ཞིང་། དེ་སྟོང་པར་བསམ། དེའི་ངང་ལས་ཡང་རྣལ་འབྱོར་མར་ལྡང་བ་ལ་སོགས་པ་བྱའོ། །དེ་ནས་རང་གི་སྤྱི་བོར་པད་མའི་གདན་ལ་བླ་མ་གོང་བཞིན་དུ་བཞུགས་པ་ལ་ཕྱི་ནང་གསང་བའི་མཆོད་པ་འབུལ་ཞིང་གསོལ་བ་གདབ་ནས། བླ་མའི་སྨིན་མཚམས་ནས་ཡེ་ཤེས་ཀྱི་འོད་ཟེར་དཀར་རྒྱངས་ཀྱིས་བྱུང་ནས། རང་གི་སྤྱི་གཙུག་ཏུ་ཐིམ་པས་ལུས་ཀྱི་སྡིག་སྒྲིབ་ཐམས་ཅད་དག །བླ་མའི་ཞལ་ནས་འོད་ཟེར་དམར་རྒྱངས་ཀྱིས་བྱུང་ནས་མགྲིན་པར་ཐིམ་པས། ངག་གི་སྡིག་སྒྲིབ་ཐམས་ཅད་དག །བླ་མའི་ཐུགས་ཀ་ནས་འོད་ཟེར་སྔོ་རྒྱངས་ཀྱིས་བྱུང་ནས་ཐུགས་ཀར་ཐིམ་པས་ཡིད་ཀྱི་སྡིག་སྒྲིབ་ཐམས་ཅད་དག །དེ་ནས་བླ་མའི་སྐུ་གསུང་ཐུགས་ལས་འོད་ཟེར་སྣ་ཚོགས་འཕྲོས་ཏེ། བདག་གི་གནས་གསུམ་དུ་ཐིམ་པས། སྐུ་གསུང་ཐུགས་ཀྱི་དམ་ཚིག་དང་རྩ་བ་
1-2-238b
དང་ཡན་ལག་གི་དམ་ཚིག་ཉེས་སྐྱོན་ཐམས་ཅད་སངས་རྒྱས་ཀྱིས་དག་པར་བསམ་མོ། །དེ་ནས་སྟོང་པའི་ངང་ལས་བྷྲུཾ་ལས་འཁོར་ལོ་རྩིབས་བརྒྱད་པའི་ལྟེ་བ་ལ་བདག་ཉིད་རྣལ་འབྱོར་མར་བསྐྱེད་པའི་སྤྱི་བོར་བླ་མ་དམ་པ་བརྟུལ་ཞུགས་ཀྱི་ཆ་བྱད་ཅན། སྐུ་ནག་ལ་འཚེར་བ། དབུ་སྐྲ་གྱེན་དུ་བཅིངས་པ། །སྤྱན་རྩ་དམར་བ། ཕྱག་གཡས་རྡོ་རྗེ་ཐུགས་ཀར་འཛིན་པ། གཡོན་སྡིགས་མཛུབ་མཛད་ཅིང་གར་བསྒྱུར་བ་གཅིག་བསམ། བསྲུང་བྱ་གཞན་རང་གི་ཐོ་ཕྱིར་བསྐོར་བ་སྤྱིར་འདི་ས་མ་ཏིའི་བསྲུང་བ་ཡིན་པས། གཞན་གྱི་བྱེད་ན་མདུན་དུ་མཁན་སློབ་ལ་སོགས་པ་ཆོས་ཕྱོགས་ཀྱིས་འབྲེལ་པ། གཡས་སུ་ཕ་མ། མདུན་དུ་སྤུན་ལ་སོགས་པ་རུས་རིགས། གཡོན་དུ་སློབ་མ་འཁོར་ཡོན་བདག །རྒྱབ་དུ་ནོར་རྫས་བསམ་གསུང་ངོ་། །གཅིག་བསམ་མོ། །འཁོར་ལོའི་ཕྱོགས་བཞིའི་རྩིབས་ལ་ཧ་རི་ནི་ས་བཞི་བསྒོམ། མཚམས་བཞིར་ཕཊ་དམར་པོ་གཅིག་བསམ། རང་ལྷའི་ས་བོན་ལས་འོད་འཕྲོས་པས་ཡི་གེ་བཞི་ལ་ཕོག་པས་ཌཱ་ཀི་མར་གྱུར། དེ་དག་ལས་ཕྱག་མཚན་མཚོན་ཆ་སྣ་ཚོགས་འཛིན་པའི་ཌཱ་ཀི་མ་དཔག་ཏུ་མེད་པས་དྲ་བ་དང་གུར་དུ་གྱུར། ཡང་ཐུགས་རྗེའི་འོད་ཟེར་པཊ་བཞི་ལ་ཕོག་པས། དེའི་ཕྱི་རོལ་ཡེ་ཤེས་མེ་བསྐལ་པའི་མེ་ལྟར་དུ་འབར་བའི་གུར་ཁང་དུ་གྱུར་པར་བསམ། འཁོར་ལོ་གཡོན་དུ་འཁོར་བས་ཉོན་མོངས་དུག་གསུམ་བསྲུང་ན་ཊཱ་ཀི་ནང་ལྟ། བཟློག་ན་ཊཱ་ཀི་ཕྱིར་བ་ལྟ་གསུམ་གཅོད། གཡས་སུ་
1-2-239a
༄༅། །འཁོར་བས་གནོད་བྱེད་བརླག་པར་ཁྱད་པར་རིགས་སྔགས་བཟློག་ན་བྱད་མ་རྩི་ལས་བསྐྱེད་ལ་རྩིབས་བར་དུ་བཅུག་ལ་བཅད་ཅིང་བསམ་མོ། །དེ་ནས་རྣལ་འབྱོར་མའི་བསྐྱེད་རིམ་བསྒོམ་པ་ནི་སྒྲུབ་ཐབས་བཞིན་ཏེ། དེ་ཡང་གཞན་འདྲ་བ་ལ་རོའི་གདན་མེད། གྲི་གུག་ཐུར་དུ་འདེབས་པ་གཡོན་དུ་འགྱིང་ཞིང་གཡས་བརྐྱང་གཡོན་ཅུང་ཟད་བསྐུམ་པའི་རྣམ་པ་ཇི་སྲིད་གསལ་བར་མ་གྱུར་གྱི་བར་དུ་བསྒོམ། དེ་ལ་མ་གསལ་ན་ཐུགས་ཀར་ཕྱག་མཚན་ནམ། ས་བོན་ལ་དམིགས་པ་གཏད་པའམ། ཡང་ན་ཞལ་གྱི་རྣམ་པ་ལ་སོགས་པ་ཁྲིག་ཁྲིག་ཏུ་བསྒོམས་པས་གསལ་བར་འགྱུར་རོ། །དེ་བརྟན་ནས་རང་གི་མདུན་དུ་རྡེའུ་ལ་སོགས་པའི་དངོས་པོ་གཅིག་ལྷར་བསྒོམ། དེ་བཞིན་དུ་གཉིས་དང་གསུམ་ལ་སོགས་པ་གོམས་པས་མིག་གི་ཡུལ་དུ་གཟུགས་ཅི་མཐོང་བ་ཐམས་ཅད་རྣལ་འབྱོར་མའི་དངོས་པོར་ཤེས་པར་བྱའོ། །དེ་ལ་གོམས་ནས་བདག་ཉིད་རྣལ་འབྱོར་མ་ཆུའི་ཟླ་བའམ། མེ་ལོང་གི་གཟུགས་བརྙན་ནམ། འཇའ་ཚོན་ལྟ་བུར་གསལ་སྟོང་གི་སྐུར་མ་གྱུར་གྱི་བར་དུ་བརྩོན་འགྲུས་ཀྱིས་བསྒོམ། དེ་བཞིན་དུ་མདུན་དུ་དངོས་པོ་ལ་སོགས་པ་ལ་རིམ་གྱིས་བསླབས་ནས་མཐར་སྣང་བ་ཐམས་ཅད་ལྷ་མོའི་སྐུ་སྒྱུ་མ་ལྟ་བུར་ཤེས་པར་བྱའོ། །དྲན་རྟོག་ཐམས་ཅད་ཀྱི་སྣང་བ། རྨི་ལམ་དུའང་དེའི་རང་བཞིན་གྱི་སྣང་བ་ལས་མ་འདས་པ་ནི་གཟུགས་བརྙན་གྱི་རྣལ་
1-2-239b
འབྱོར་ཞེས་བྱ་བ་བསྐྱེད་རིམ་ལ་བརྟན་རྣམ་པ་གསལ་བ། ངོ་བོ སྟོང་པ། རྣམ་དག་དྲན་པའི་ཏིང་ངེ་འཛིན་ཡིན་གསུངས་པ་ཡིན་གསུང་། དེ་ནས་རང་ཉིད་རྣལ་འབྱོར་མའི་སྤྱི་བོར་བླ་མ་དམ་པ་གསལ་བར་དམིགས་ལ། ཕྱི་ནང་གསང་བའི་མཆོད་ལུས་ལོངས་སྤྱོད་ཀྱི་པ་ཕུལ་ལ། གསོལ་བ་གདབ། བླ་མའི་ཐུགས་ཀ་ནས་འོད་ཟེར་འཕྲོས་ཏེ། ཕྱོགས་བཅུ་དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། རྣལ་འབྱོར་མ་ཐམས་ཅད་ཀྱི་སྐུ་གསུང་ཐུགས་གཉིས་སུ་མེད་པའི་ཡེ་ཤེས་ཐམས་ཅད་བསྡུས་ཏེ། གུ་རུའི་དབུ་གཙུག་ཏུ་བཞུགས། གུ་རུའི་ཐུགས་ཀ་ནས་འོད་ཟེར་བྱུང་པས་བདག་གི་ཚངས་བུག་ཏུ་བཞུགས་པ་ལས། སྙིང་རིན་པོ་ཆེའི་གཞལ་ཡས་ཁང་པདྨའི་དབྱིབས་ཅན་གྱི་ནང་དུ་རྣལ་འབྱོར་མ་མཐེབ་གང་ཙམ་གཅིག་བར་སྣང་ཉི་ཟླ་ལྟར་རྟེན་མེད་པར་ལ་འཕྱོ་བ། དཔྲལ་བར་གཡུང་དྲུང་གཡོན་དུ་འཁོར་བ་གཅིག་ལ་ཤེས་པ་གཏད། ལྟེ་བར་ཆོས་འབྱུང་གྲུ་གསུམ་གྱི་ནང་དུ་འཁོར་ལོ་རྩིབས་བཞི་ལྟེ་བ་ལ་བཾ། འདབ་མ་བཞི་ལ་ཡཾ་བཞི་ནམ་མཁའ་ལ་ལྡིང་བ་བཞིན་དུ་གཡོན་དུ་འཁོར་བ་ལ་དམིགས་པ་གཏད། སྤྱི་བོའི་བླ་མ་འོད་དུ་ཞུ་ནས། འོད་རྟ་རྔའི་ཚུལ་དུ་རྩ་དབུ་མར་བརྒྱུད་དེ། ཐུགས་རྗེའི་རྣལ་འབྱོར་མའི་གཡུང་དྲུང་ལ་ཐིམ། གཡུང་དྲུང་རྣལ་འབྱོར་མ་ལ་ཐིམ་ཞིང་འོད་དུ་ཞུ་བས་ལྟེ་བའི་བཾ་ལ་ཐིམ། ཡི་གེ་བཞི་ཡང་སྤྱི་བོའི་གུ་རུ་དང་། ཐུགས་རྗེའི་ལྷ་
1-2-240a
༄༅། །ལ་དམིགས་པའི་དུས་སུ་དྲོད་སྐྱེ་སྟེ། རགས་པ་ཙམ་དང་པོའོ། །གུ་རུ་རྗེ་བཙུན་མ་ལ་ཐིམ་ཞིང་། དེ་ཡང་ལྟེ་བའི་བཾ་ལ་ཐིམ་པའི་དུས་སུ་བདེ་བ་སྐྱེ་སྟེ་ཕྲ་བ་གཉིས་པ། ཡི་གེ་བཞི་བཾ་ལ་འདུས་པའི་དུས་སུ་མི་རྟོག་པ་སྐྱེ་སྟེ། ཤིན་ཏུ་ཕྲ་བ་གསུམ་མོ། །བདག་ཀྱང་མི་དམིགས་པ་སྣང་བ་མེད་པ་ཡིན་པས་དེ་ལས་ལྷར་སྣང་བའི་དུས་སུ་ཟུང་འཇུག་བདེ་གསལ་མི་རྟོག་ཐམས་ཅད་པ་ཐམས་ཅད་དུ་འཆར་བས་འོད་གསལ་ཏེ་བཞི་པའོ་བཾ་ལ་འདུས། བཾ་ལས་འོད་འཕྲོས་པས་རང་ལུས་འོད་དུ་ཞུ་ནས་སྟོང་པར་ཅུང་ཟད་བསྒོམ༑ དེའི་ངང་ལས་སྐད་ཅིག་མས་ལྷར་ལྡང་ངོ་། །དེ་ནས་རང་ལུས་རྣལ་འབྱོར་མའི་འཇའ་ལྟར་ཡལ་བའི་སྤྱི་བོ་ནས་ལྟེ་བའི་འོག་སོར་བཞིའི་བར་དུ་དྷཱུ་ཏཱི་ཕྱི་དཀར་ལ་ནང་དམར་བར་བསམ་པའི་ནང་ལྟེ་འོག་གཉེར་མའི་ཐད་ཀར་རླུང་ནང་དུ་འཇུག་པའི་དུས་སུ་བཾ་ལ་མེ་འབར་བས་ལུས་ཀྱི་ནང་མེས་ཁེངས་པར་བསམ། ཕྱིར་འབྱུང་བའི་དུས་སུ་འོད་ཟེར་ཁ་དོག་ལྔ་ལྡན་གྱིས་སེམས་ཅན་སྦྱང་བར་བསམ་གསུངས་ཆོས་འབྱུང་ཁ་གྱེན་དུ་ལྟ་བ་རྩ་བ་ཕྲ་བ་གསང་གནས་སུ་བསྟན་པའི་དབུས་སུ་པདྨ་འདབ་བཞི་ལྟེ་བ་དང་ལྔ་ལ་ཡི་གེ་ལྔ་དམར་རམ་མེ་བསམ། གཡོན་གྱི་ཙཀྲ་གཉིས་ཕྱི་སྔོ་ལ་ནང་སེར་བའི་མར་སྣ་དྷཱ་ཏཱིར་ཚུད་པ་ལས་ཡར་སྣ་སྣ་བུག་གཉིས་སུ་བསམ་ལ། དང་པོ་འོག་རླུང་ཅུང་ཟད་བསྐྱོད་པས་ཆོས་འབྱུང་མེ་ལྟར་འབར་ཏེ་དར་པོ་ཆེ་རླུང་གིས་བསྐྱོད་པ་བཞིན་དམར་ལྷབ་ལྷབ་པ་ལ་དམིགས་པ་གཏད། དེ་ནས་འོག་རླུང་བཞག་ལ་སྟེང་རླུང་སོར་གཅིག་ཙམ་ནང་དུ་
1-2-240b
དྲངས་ཏེ་མནན་པས་ཡི་གེ་ལྔ་མེར་འབར་བ་ལ་དམིགས། ཡང་ཡི་གེ་གཡོན་དུ་འཁོར་བ་ལ་དམིགས་སོ། །དེ་ནས་ལུས་ཀྱི་དྲོད་ཆུང་ན་ཙོག་པུར་བྱས་པ་ལ་ལག་པ་བསྣོལ་ནས་ལུས་མ་གཡེངས་གཡོན་ལ་དམ་དུ་འཁྱུད། ལུས་སྤྱི་བསྒྲིམ། སྟེང་འོག་གི་རླུང་ཁ་སྦྱོར་དུ་བྱས་པས་ཆོས་འབྱུང་གཡོ་ཞིང་། ཡི་གེ་བཞི་གཡོན་དུ་འཁོར་ཞིང་མེ་འབར་བས་ལུས་ཕྱི་ནང་ཐམས་ཅད་འུ་རུ་རུ་འབར་བར་བསམ་མོ། །དྲོད་ཆེ་ཡང་བདེ་བ་ཆུང་ན། བཾ་ལས་མེ་དམར་ནར་གྱིས་བབས་ཏེ་ལྟེ་བ་ཡན་ཆད་མེར་གྱིས་རྒྱས་པར་བསམ་མོ། །དེ་ལྟར་གཉིས་གཉིས་ཀྱིས་བདེ་དྲོད་ཕུལ་དུ་ཕྱིན་པ་བྱུང་ཡང་མི་རྟོག་པ་མེད་ན་མི་བརྟན་པས། སེམས་མི་རྟོག་པ་ངོས་བཟུང་སྟེ། སྙིང་གར་ཐིག་ལེ་དཀར་པོ་ཡུངས་དཀར་རམ། སྲན་མ་ཙམ་སྣུམ་ལ་འདྲིལ་བ་གཅིག་གཡོན་དུ་འཁོར་བ་ལ་དམིགས་པ་གཏད་པས། ཐོག་མར་བདེ་བ་སྐྱེ། དེས་སེམས་ཟིན་ནོ། །དེ་ལྟ་བུའི་བདེ་བ་དེ་ལ་དངོས་པོ་རང་མཚན་མར་གྲུབ་པ་མེད་པ་ལྟར་རང་གི་རིག་པ་བྱང་ཆུབ་ཀྱི་སེམས་ཀྱང་དེ་བཞིན་ཏེ། ཁ་དོག་དང་དབྱིབས་སུ་མ་གྲུབ། བལྟས་པས་མི་མཐོང་། བྱས་པས་མི་འོང་ངོ་། །བཟུང་བས་མི་ཟིན་པའི་སྟོང་པ་ཉིད་དོ། །ཡང་དངོས་པོ་མེད་དེ་བདེ་ཆེན་གྱིས་རྒྱས་བཏབ་པ་ནི། སེམས་སྟོང་པ་ཉིད་གསལ་གདབ། གསལ་བ་ཉིད་སྟོང་པ་ལ་དངོས་པོ་ཡིད་ཀྱི་མཚན་མ་དང་བྲལ་བ་མ་བཅོས་མ་
1-2-241a
༄༅། །སྒྲིམས། མ་སླད་པར་དྭངས་སང་ངེ་བ་འདུས་མ་བྱས་ཤིང་ལྷུན་གྱིས་གྲུབ་པ། རྣམ་པ་གསལ་ལ་ངོ་བོ་སྟོང་ཞེས་བྱ་བའི་དོན་ཉམས་སུ་མྱོང་བ་འདི་ལ་བདེ་ཆེན་གྱི་རྣལ་འབྱོར་ཞེས་བྱ་གསུང་ངོ་། །དེ་ནས་དེའི་དུས་སུ་སྙིང་རླུང་ངམ། བྲོ་གར་ལ་སོགས་པ་བྱུང་ན་ཆོས་འབྱུང་གཡོ་བ་དང་ཡི་གེ་མི་འཁོར། བོ་གཅིག་པུ་ལས་མེ་སོར་བཞི་ཙམ་གཅིག་ལ་ཤེས་པ་གཏད། ཤེས་པ་ཡུལ་ལ་འཕྲོ་ཞིང་རྒོད་ན་སྙིང་གར་ཕག་མོའི་དཔྲལ་བར་གཡུང་དྲུང་དམར་པོ་སྤུས་བྲིས་པ་ཙམ་གཡོན་དུ་འཁོར་བ་ལ་དམིགས། དེས་ཀྱང་འཕྲོ་ན། དེ་ཉིད་རང་བཞིན་མེད་པར་བསྒོམ་པས་འཕྲོ་བའི་ཡུལ་གྲུབ་པ་མེད་པར་མི་རྟོག་པར་འགྱུར་རོ། །ཤེས་པ་བྱིང་ན་སྟེང་རླུང་མནན་འབར་འཛག་བྱ། རྨུགས་ན་སྙིང་ཁའི་རྣལ་འབྱོར་མའི་སྤྱི་བོར་ཐིག་ལེ་དཀར་པོ་སྲན་འབྲུ་ཙམ་པ་ལ་ཤེས་པ་གཏད། སྐབས་སུ་ཚངས་བུག་ན་ཡར་བཏོན་ལ་ནམ་མཁའ་ལ་ཧྲི་ལི་ལི་འདྲིལ་བར་བསམ། ཡང་ཕབ་ནས་དེ་ཉིད་དུ་གནས་པར་བསམ་མོ། །དེ་དག་གི་དུས་སུ་རི་མཐོན་པོའི་རྩེར་ཕྱིན་ལ་བླ་མ་ལ་གསོལ་བ་གདབ། ཉམས་མྱོང་གི་གླུ་བླང་། སེམས་ལ་ཕན་པའི་ཆོས་གླེང་། དབང་པོ་ཡུལ་ལ་ཡན་དུ་བཅུག་པ་ལ་སོགས་པའི་སྤྱོད་ལམ་བརྟེན་པས་སེལ་བ་ཡིན་གསུང་ངོ་། །དེ་ནས་གདམས་པ་འདིའི་གནད་ནི། ལྷའི་སྐུ་སྣང་ལ་རང་བཞིན་མེད་པར་གསལ་བས། ཉོན་
1-2-241b
མོངས་པའི་ཟག་པ་ཟད་ནས་འབྱུང་བཞིའི་ལུས་ཀྱི་ཆ་མི་འཛིན་པས་འབྱུང་བཞིའི་ནད་འཇུག་པའི་གནས་མེད་དེ། གལ་ཏེ་རྩ་རླུང་ལ་སོགས་པའི་རྟེན་འབྲེལ་གྱིས་ཅུང་ཟད་བྱུང་ན་ཡང་བླ་མ་ལ་གསོལ་བ་གདབ་ཅིང་བསྒོམ་པ་ཉིད་ཀྱིས་རང་ཞི་འགྲོ་སྟེ་གསུངས་པ་དེའི་མན་ངག་ཁྱད་པར་དུ་ཚད་ནད་སྟོད་ནས་གདོན་པ་དང་། གྲང་ནད་སྨད་ནས་གདོན་པ་དང་། འདྲེས་པའི་ནད་ལྟེ་བ་ནས་འདོན་གསུངས་པས། དེའི་མན་ངག་ཉམས་སུ་བླང་བ་ནི། གང་བྱུང་ཡང་ལུས་སྐྱིལ་ཀྲུང་བཅས་ལ། འོད་ཀྱི་སྟོང་ར་དམར་པོའི་དབྱིབས་རྡོ་རྗེ་རྩེ་ལྔ་པ་རྭ་གདེངས་པའི་རྣམ་པ་ཅན་དུ་བསྒོམ། ཚད་ནད་ལ་འོག་ཏུ་རླུང་གི་དཀྱིལ་འཁོར་གཞུ་བརྡུངས་པ་ལྟ་བུ་བ་དན་དང་བཅས་པ་བསམ། སྟེང་རླུང་སྒྲ་བཅས་སུ་སོ་བར་ནས་རྔུབས་ལ་འོག་གི་རླུང་གི་དཀྱིལ་འཁོར་ཡང་གཡོ་བས་ནད་ཐམས་ཅད་རྡོ་རྗེའི་རྭ་བར་ན་ཕར་རླངས་པ་དམར་ནག་དུ་བུན་བུན་སོང་ནས་ནམ་མཁའ་ལ་ཐིམ་པར་བསམ་ཞིང་ལག་པ་གཉིས་ས་ལ་གཏད། མགོ་བཀུག་ནས་རླུང་སྣ་ནས་ཤུགས་བསྐྱེད་ལ་བཏང་ལ་ཐུབ་ཚད་ཀྱིས་ནང་དུ་མི་དྲང་། མ་ཐུབ་ན་སོ་བར་ནས་ནང་དུ་རྔུབས་ཏེ། དེ་རིག་པ་གཉིས་དང་ཆས་བས་ཡང་དང་ཡང་དུ་བྱས་པས་ཞི་བར་འགྱུར་རོ། །གྲང་ནད་ནི་རང་རྡོ་རྗེའམ། སྟོང་ར་གསལ་བར་བྱས་ལ་ལྟེ་བ་ལ་སོགས་པ་གང་ན་དེར་རཾ་དམར་ས་ལེ་བ་གཅིག་བསམ། དེ་ལས་མེ་
1-2-242a
༄༅། །དམར་འུ་རུ་རུ་འབར་བས་ནད་ཀྱི་དངོས་པོ་ཐམས་ཅད་ཅོམ་ཅོམ་བསྲེགས་པར་བསམ་པས་རྡོ་རྗེའི་རྭ་བར་ན་མར་སྔོ་བུན་བུན་ས་ཞབས་སུ་ཐིམ་པར་བསམ་ཞིང་འོག་རླུང་བསྡམ། སྟེང་སྒྲ་མེད་དུ་མནན༑ ལག་པ་གཉིས་པུས་མོ་ལ་འཁྱུད། བསུས་པ་སྒལ་པ་ལ་སྦྱར་ནས་འཁོར་ལོ་ལྟར་བསྐོར་བས་ཞིའོ། །འདྲེས་པ་ནི་སྟེང་རླུང་སྒྲ་བཅས་སུ་རྔུབ། འོག་རླུང་དྲག་ཏུ་འཐེན་ཞིང་ཁ་སྦྱོར་བྱས་པས། ནད་ཐམས་ཅད་ལྟེ་བའི་ཁར་ཁྲག་དང་ཆུ་སེར་གྱི་རྣམ་པར་འདུས་ལ་རླུང་གིས་ཕྱིར་ཕུལ་བས་རླངས་པ་སྔོ་དམར་གྱི་ཚུལ་དུ་འཐོན་པར་སྣ་ལ་ཐིམ་པར་བསམ། ཡང་འོད་ཟེར་དེ་ལ་རྣལ་འབྱོར་མ་ཡེ་ཤེས་ཀྱི་མེ་དཔུང་འབར་བའི་དབུས་ན་བཞུགས་པ། སྤྱི་བོའི་རྒྱུའི་གསང་གནས་ཡེ་ཤེས་ཀྱི་བདུད་རྩི་ཙན་དན་དཀར་པོའི་ཆུ་ལྟར་བསིལ་བས་ནང་དག་པར་བསམ། ཡང་ནང་དུ་གཏུམ་མོ་ཡེ་ཤེས་ཀྱི་མེ་སྦར་ཞིང་། ཕྱི་བཀྲུས་སམ། དཀར་རྒྱངས་དམར་རྒྱངས་བྱ་བ་གང་རུང་གིས་སེལ་ལོ། །དེ་ནས་ལུས་སེམས་ངལ་དུབ་དང་། དུཿཁས་མ་གདུངས་པའི་དུས་སུ་བསམ་གཏན་གྱི་ཡན་ལག་ལྔས་གནས་ཏེ། རྣམ་ཤེས་ནམ་མཁའི་མཐོངས་སུ་སྐྱུར། ཚོགས་དྲུག་རྒྱ་ཡན་ལྷུག་པར་བཞག་གོ །དེ་ལས་མི་གནས་ན་ལྟེ་བ་སྐྱམ་སྲིད་ཀྱི་གནས་ན་སེམས་ཀྱི་གནས་ཆོས་འབྱུང་དམར་པོ་གྲུ་གསུམ་སྟོང་པ་ལ་ཤེས་པ་གཏད། དེ་ཡང་ལྷོད་ཀྱིས་ཡིད་
1-2-242b
ལ་མི་བྱེད་པར་ཀློད་ལ་བཞག །ཤེས་པ་གཏད་པས་སེམས་འཛིན་གསལ་ཀློད་པས་མི་རྟོག་པར་འགྲོ་བས་གཉིས་ཀ་གལ་ཆེ། ཡང་དེ་ལྟར་ཀློད་པས་སེམས་གཞན་དུ་མི་འཕྲོ་བའི་སྟོང་པ་ཐབས་དང་བྲལ་བ་དེས་ན་ཅིར་ཡང་མི་འགྱུར་ལ་འདུས། བདག་ཐུགས་རྗེའི་རྣལ་འབྱོར་མ་ལ་འདུས། དེ་ལྟེ་བའི་ཆོས་འབྱུང་། དེ་ཐིག་ལེ་ཇེ་ཕྲ་ཇེ་ཕྲ་ལ་སྟོང་པར་སོང་བའི་ངང་ལས་གཉིད་དུ་ལྷན་གྱིས་འོད་གསལ་སྟོང་པ་ཉིད་བདེ་ཆེན་ཆོས་ཀྱི་སྐུ་མངོན་དུ་གྱུར་པ་ཡིན་ནོ།། །།
༄། །ལྟ་བ་ཉམས་མྱོང་།
བླ་མ་རིན་པོ་ཆེའི་ཞལ་ནས། ལྟ་བ་ཉམས་མྱོང་ངམ། སྤྱིར་ཀུན་རྫོབ་ཏུ་རྟགས་ཀྱི་རྣལ་འབྱོར་མ། དོན་དམ་དུ་ཆོས་ཉིད་ཀྱི་རྣལ་འབྱོར་མ་ཡིན་གསུང་། དེ་ཡང་དང་པོ་ནི། རྣལ་འབྱོར་མའི་སྐུ་མདོག་ཞལ་ཕྱག་རྒྱན་དང་གདན་ལ་སོགས་པ། ངེས་པ་ཅན་ལ་ཟེར་ཏེ། བསྒོམ་ཡོད་ཀྱང་བྱ་བ་ཡིན། དོན་དམ་གྱི་རྣལ་འབྱོར་མ་ནི་ཆོས་ཉིད་སྐྱེ་བ་མེད་པའོ། །དོན་དམ་པར་ཅིའི་ངོ་བོར་ཡང་གྲུབ་པ་མེད་པ། བསྒོམ་མེད་བྱ་བ་ཡིན། དེ་ལྟར་ཡིན་པས་ཉམས་སུ་ལེན་དགོས་གསུང་ངོ་། །པས། བདེ་བའི་རྒྱས་བཏབ་ལ་བསྒོམ་པ་ནི། སྨིན་མདོའི་བུག་པ་དམར་སང་ངེ་བ་སྲན་མ་ཙམ་གཅིག་གི་ནང་དུ་ཐིག་ལེ་ཡུངས་ཀར་ཙམ་དཀར་ལ་འཚེར་བ་སྣུམ་ལ་འདྲིལ་བ། རེག་བྱ་བདེ་བ་གཡོན་དུ་སྒ་ར་ར་འཁོར་བ་ལ་ཤེས་པ་གཏད་པས་དང་པོ་དེ་རང་དུ་བདེ་བ་སྐྱེ། དེ་ནས་ལུས་ཐམས་ཅད་ལ་ཁྱབ་པར་སྐྱེའོ། །བདེ་བ་ཅིའི་ངོ་བོར་ཡང་གྲུབ་པ་མེད་པ་རང་བཞིན་གཉུག་མའི་ངང་དུ་ཀློད་ལ་བཞག །དེ་
1-2-243a
༄༅། །ཡང་ཐུན་ཆུང་ལ་གྲངས་མང་བར་བྱ། གོམས་ནས་ཐུན་གཏད། ཡང་ཚུར་འཛིན་པ་ནི་མཉམ་བཞག་གོ །རྗེས་ཀྱི་དུས་སུ་ནི་སྤྱོད་ལམ་ཐམས་ཅད་དུ་དྲན་རྟོག་ཅི་བྱུང་སྟོང་པ་ཉིད་ལས་བྱུང་ཞེས་དེར་ཐིམ་པ་ནི། ནམ་མཁའ་ལ་སྤྲིན་བྱུང་ཡང་དེ་ཉིད་དུ་ཐིམ་པ་བཞིན་ནོ། །དེ་ནས་མཉམ་རྗེས་ཀྱི་ཏིང་ངེ་འཛིན་བསྲེ་བ་ལ་མཚན་མོ་ཉལ་བའི་ཚེ་ན། སེམས་ཅན་ཐམས་ཅད་ཀྱི་དོན་དུ་ཆོས་སྐུ་སྟོང་པ་ཉིད་མངོན་དུ་བྱས་ལ་མོས་པས་སྒྱུ་མ་ལྟ་བུའི་རྣལ་འབྱོར་མར་གསལ་བཏབ་པ། རང་གི་སྤྱི་བོར་བླ་མ་དམ་པ་ལ་འོད་གསལ་རྟོགས་པའི་གསོལ་བ་བཏབ་པས། འོད་དུ་ཞུ་བས་སྙིང་འོད་ཀྱི་པད་མ་དཀར་པོའི་ལྟེ་བ་ལ་རྣལ་འབྱོར་མའི་རྣམ་པར་བཞུགས་པའི་ལྟེ་བར་ཆོས་འབྱུང་དམར་པོ་གྲུ་གསུམ་པའི་ནང་དུ་རླུང་སེམས་འདྲེས་པའི་ཐིག་ལེ་དཀར་པོ་དམར་པོའི་མདངས་ཆགས་པ་གཅིག་བསམ། དེ་ནས་གཉིད་བྱུང་བའི་དུས་སུ་ཐུགས་ཀའི་རྣལ་འབྱོར་མ་ལས་འོད་ཟེར་འཕྲོས་པས་སྣང་སྲིད་ཐམས་ཅད་འོད་ཟེར་རྣམ་པར་བདག་ཁྱེར། བསྒོམ་པ་འཛིན་མེད་ཐོག་བབས། སྤྱོད་པ་སྣང་བ་བཙན་ཐབས། འབྲས་བུ་སྐུ་གསུམ་རང་ཆས་ཡིན་གསུང་། དེ་ལ་ལྟ་བ་ནི། ཕྱི་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་རང་གི་སེམས་སུ་ཤེས་ཤིང་། སེམས་དེ་ཡང་གདོད་མ་ནས་རང་བཞིན་གྱིས་རྣམ་པར་དག་སྟེ། ཉེས་པའི་སྐྱོན་
1-2-243b
གྱིས་གོས་སུ་མེད། །ལེགས་པའི་ཡོན་ཏན་གྱིས་བརྒྱན་དུ་མེད། མཚོན་པའི་དཔེ་དང་། བརྗོད་པའི་ཚིག་དང་། དམིགས་པའི་དྲན་པ་དང་བྲལ་བའི་སྟོང་པ་ཉིད་སྙིང་རྗེ་ཐབས་དང་ཤེས་རབ། རིག་པ་དང་སྟོང་པ༑ བདེ་བ་དང་སྟོང་པ། གསལ་བ་དང་སྟོང་པ་གཉིས་སུ་མེད་པར་ཉམས་སུ་མྱོང་བ་དེ་ལམ་དུ་ཁྱེར་བའོ། །བསྒོམ་པ་ནི་དེ་ལྟར་ཡིན་ཡང་། ལས་དང་པོ་པའི་གང་ཟག་གིས་རྟོགས་པར་དཀའ་བས། ནང་འཛིན་མེད་དབང་པོའི་སྒོ་དྲུག་ཏུ་རྟོགས་པ་འདི་གཟུང་བྱའི་ཡུལ་ཚོགས་དྲུག་གི་སྣང་བ་ལ་བསྲེ་བར་བྱ་སྟེ། བླ་མ་དམ་པའི་གདམས་ངག་གིས་སྣང་སེམས་དབྱེར་མེད་དུ་མཚོན་པ་ནི། མིག་དང་། རྣ་བ་དང་། སྣ་དང་༑ ལྕེ་དང་། ལུས་དང་། ཡིད་ཀྱི་དབང་པོ་རྣམས་གཟུགས་སུ་སྣང་བ་དང་། སྒྲར་དྲག་གྲགས་པ་དང་། དྲིར་ཚོར་བ་དང་། རོར་མྱོང་བ་དང་། རེག་ཏུ་འཚོར་བ། དྲན་པར་རྟོགས་པ་ཐམས་ཅད་རང་བཞིན་མེད་པ་ཡིན། ཅི་ལྟར་ཞེ་ན། འདི་ལྟར་གཟུགས་རྣམས་མཐོང་བར་བྱེད་པ་མིག་ཡིན་ལ། མིག་གི་རྣམ་པར་ཤེས་པ་དཀར་པོ་ལ་སོགས་པའི་ཁ་དོག་རྣམ་པ་ལྔ་དང་། གྲུ་བཞི་ལ་སོགས་པའི་དབྱིབས་བརྒྱད། གང་དུའང་མ་གྲུབ་པས་རང་བཞིན་མེད་དོ། །དེ་བཞིན་དུ་སྒྲ་ཐོས་པར་བྱེད་པ་རྣ་བ་དང་། དྲི་སྣོམ་པར་བྱེད་པའི་སྣ་དང་། རོ་མྱོང་བར་བྱེད་པའི་ལྕེ་དང་། རེག་མྱོང་བར་བྱེད་པའི་ལུས་དང་། འཁོར་འདས་ཀྱི་
1-2-244a
༄༅། །ཆོས་ཐམས་ཅད་གཏན་ལ་ཕབས་པར་བྱེད་པ་ཡན་ཏེ། རྣམ་ཤེས་དེ་དག་ཐམས་ཅད་ཀྱང་དབྱིབས་དང་ཁ་དོག་དེ་ཐམས་ཅད་དང་བྲལ་བས་གདོད་མ་ནས་རང་བཞིན་གྱིས་སྟོང་པར་ཤེས་པར་བྱའོ༑ ༑སྤྱོད་པ་ནི། དེ་ལྟར་སེམས་དངོས་པོའི་གནས་ལུགས་བདག་མེད་པ་ལ་བདག་ཏུ་འཛིན་པས། སྦྱིན་པ་གཏོང་བ་ལ་སོགས་པ་མི་ནུས་ཤིང་ལས་འབྲས་ཁྱད་དུ་བསད་ནས་སྡིག་པ་རང་ཁ་མ་སྤྱོད་པ་ལ་སོགས་པའི་སྐྱོན་དང་། ཡང་དད་པ་དང་། སྙིང་རྗེ་དང་། ཏིང་ངེ་འཛིན་དང་། ལྷའི་ལུས་སྟོན་པ་དང་། མངོན་པར་ཤེས་པ་ལ་སོགས་པ་ཡོན་ཏན་ཐམས་ཅད་རང་གི་སེམས་སུ་ཁོ་ཐག་ཆོད་ལ། དེ་ཡང་གདོད་མ་ནས་སྐྱེ་འགག་གནས་གསུམ་དང་བྲལ་ལམ། སྟོང་པ་ཉིད་དུ་ཐག་ཆོད་པས་བཟང་ངན་དུ་རྟོགས་པས་སྣང་གྲགས་སུ་ཤར་བ་འདི་ཐམས་ཅད་ཆོས་ཉིད་ཀྱི་ངང་དུ་བདེ་སྟོང་དུ་ཤར་ནས་མ་རིག་པའི་འཁྲུལ་པ་རང་སར་དྭངས། རིག་པ་དྲི་མེད་མཁའ་ལྟར་དག །གློ་བུར་གྱི་རྣམ་རྟོག་གྲོགས་སུ་ཤར་ཙམ་ན་རང་བཞིན་གྱི་སྤྱོད་པའོ། །འབྲས་བུ་ནི། རྡོ་རྗེ་མཁའ་འགྲོ་འམ་རྣལ་འབྱོར་མ་ཞེས་བྱ་སྟེ། དེ་ཡང་མ་རྟོགས་པ་ནི་རྣམ་པར་རྟོག་པས་ཡུལ་དང་ཡུལ་ཅན་དུ་གཟུང་བས་སོ་སོར་སྣང་ཡང་། རྟོགས་པའི་དུས་ན་རང་གི་སེམས་ཉིད་འདི་སྐུ་གསུམ་གྱི་རང་བཞིན་ཡིན་ནོ། །དེ་གང་ཞེ་ན། རྡོ་རྗེ་ནི་ཐོག་མར་རྒྱུ་ལས་མ་བྱུང་། བར་
1-2-244b
དུ་རྩོལ་བས་མ་བསྐྱེད། ཐ་མར་རྐྱེན་གྱིས་མི་འཇིག་པའི་སེམས་ཉིད་རྣམ་པར་དག་པ་དེ་ཆོས་སྐུ། ཆོས་ཉིད་སྟོང་པའི་དབྱིངས་སུ་འགྲོ་བ་རིག་པའི་ཡེ་ཤེས་གསལ་ལ་མ་འགགས་པར་འགྲོ་བའམ། སེམས་མ་བཅོས་པའི་རྣལ་མ་དང་། ཆོས་ཉིད་རྣམ་པར་དག་པ་དེ་བླ་མ་དམ་པས་ངོ་སྤྲད་པས་གཉིས་མེད་དུ་འབྱོར་པ་དེ། དོན་རིག་སྟོང་དབྱེར་མེད་དུ་རྟོགས་པ་དེ་ལོངས་སྐུ། མ་ནི་མས་བུ་བསྐྱེད་པ་ལྟར་གཉིས་མེད་ཀྱི དོན་རྟོགས་པས་གཟུང་བྱའི་ཡུལ་སྣང་འཛིན་བྱེད་ཀྱི་ཤེས་པ་གཉིས་ཀྱིས་འཆིང་བ་རང་སར་གྲོལ་བ་སྤྲུལ་པའི་སྐུའོ། །དབང་པོ་རབ་ནི་དེ་ལྟར་རྟོགས་པའི་གང་ཟག་དེ་ནི། ལྟ་བ་དང་བསྒོམ་པ་སྤྱོད་པ་དང་འབྲས་བུ་ཐམས་ཅད་སེམས་སུ་ཤེས། སེམས་ཉིད་འོད་གསལ་དོན་དམ་པའི་བདེན་པར་ཤེས་པ། བར་དོ་དང་པོ་ལ་དོན་གྱི་རྣལ་འབྱོར་མ་མངོན་དུ་གྱུར་ཏེ། སྐྱེ་བ་འདི་ལ་བརྟེན་ནས་སངས་རྒྱ། དབང་པོ་འབྲིང་བར་དོ་ཡིད་ཀྱི་ལུས་ཀྱིས་བླ་མ་དམ་པས་གདམས་པའི་ངོ་སྤྲད་དེ་བསྒོམས་པས་རྣལ་འབྱོར་མའི་ལུས་སྒྱུ་མ་ལྟ་བུ་ཐོབ་པར་འགྱུར། དབང་པོ་ཐ་མ་ཡང་ཆོས་དང་ལྡན་པའི་རིགས་ཁྱད་པར་ཅན་དུ་སྐྱེ་བ་བླངས་ཏེ། དེ་ཡང་བླ་མ་དམ་པས་རྗེས་སུ་བཟུང་ཞིང་ལས་ཀྱིས་འཕྲོ་མཐུད་ནས་ཉམས་སུ་བླང་བའི་སྟོབས་ཀྱིས་སེམས་ཉིད་རྡོ་རྗེ་རྣལ་འབྱོར་མའི་དོན་རྟོགས་པར་འགྱུར་ཏེ། སྲིད་པའི་འཆིང་བ་ལས་གྲོལ་ཏེ། 
1-2-245a
༄༅། །སྐུ་གསུམ་གྱིས་སེམས་ཅན་གྱི་དོན་རྫོགས་པར་འགྱུར་རོ།། །།
༄། །རྡོ་རྗེ་རྣལ་འབྱོར་མའི་མན་ངག
བླ་མ་དམ་པ་རིན་པོ་ཆེ་ལ་ཕྱག་འཚལ་ལོ། །འདིར་རྡོ་རྗེ་རྣལ་འབྱོར་མའི་མན་ངག་ལ། རང་དང་སྣང་བ་སྒྱུ་མར་རྟོགས་པར་བྱེད་པ་ནི༑ སྔར་བསྐྱེད་རིམས་ཀྱི་སྐབས་སུ་ལྷ་སྐུ་སྒྱུ་མ་ལྟ་བུའི་བསྒོམ་དོན་ཉིད་ཡོན་ནོ། །གཉིད་དང་རྨི་ལམ་དུ་བསྲེས་ནས་བསྒོམ་པ་ནི་འདི་ལྟར་བྱ་སྟེ། གནས་ཁང་དབེན་པར་མལ་ཆུང་བདེ་མོའི་ནང་དུ་རང་ཉིད་ཆོ་གའི་རིམ་པ་ལྟར་མངོན་རྟོགས་བསྒོམས་ནས། སྦྱོར་བ་གཉིད་ཉལ་བའི་དུས་སུ་སྔས་མཐོ་བ་ལ་གཞོགས་གཡས་པ་གཏད་ནས་ཅོག་མ་ཉལ་དུ་བྱས་ལ་ཕྱི་ནང་གི་ཆོས་ཐམས་ཅད་རྨི་ལམ་གྱི་གནས་སྐབས་འདྲ་བར་མོས་པ་བྱས་ཤིང་། མཉམ་བཞག་གཉིད་ལ་སྦྱོར་བའི་དུས་སུ་རང་ཉིད་རྣལ་འབྱོར་མར་གསལ་བའི་མགྲིན་པར་པདྨ་དམར་པོ་འདབ་མ་བཞི་པའི་ལྟེ་བར་བཾ་དམར་ས་ལེ་བ་གཅིག་བསམ། སྤྱི་གཙུག་ཏུ་བླ་མ་རྣལ་འབྱོར་མའི་རྣམ་པར་སྤྱན་དྲངས་ཏེ། མོས་གུས་སིངས་ཀྱིས་བྱས་ལ། དོ་ནུབ་རྨི་ལམ་ཟིན་པར་བྱིན་གྱིས་རླབས་པར་མཛད་དུ་གསོལ་ཞེས་ལན་གསུམ་མམ་བདུན་དུ་གསོལ་བ་གདབ་པས། དེ་འོད་ཀྱི་རྣམ་པར་ཚངས་བུག་ཏུ་མར་ཞུགས་ཏེ་མགྲིན་པའི་བཾ་ལ་ཐིམ་ཞིང་། བཾ་དེ་བླ་མ་དང་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། དཔའ་བོ་དང་མཁའ་འགྲོ་ཐམས་ཅད་ཀྱི་སྐུ་གསུང་
1-2-245b
ཐུགས་གཉིས་སུ་མེད་པའི་ཡེ་ཤེས་ཀྱི་ངོ་བོ་ཉིད་ཡིན་སྙམ་དུ་བཾ་ལ་ཤེས་པ་ཧྲིལ་གྱིས་བཅུག་པ། དང་པོ་རྨི་ལམ་རང་དུ་བཾ་དེ་གསལ་བར་འོང་། དེའི་རྗེས་ལ་རང་རྣལ་འབྱོར་མར་གནས་པའི་ངང་ལས་མི་དམིགས་པར་བྱ་སྟེ། བཾ་རང་ཡང་སྟོང་པའི་ངང་དུ་ཤེས་པ་བཅུག་ནས་གཉིད་ལོག་པས་ཐམས་ཅད་རྨི་ལམ་དུ་ཤེས་པའམ། སྒྱུ་མ་ལྟ་བུར་ཤེས་པ་འབྱུང་སྟེ། དེ་ནི་མཉམ་བཞག་ལ། རྗེས་ཐོབ་ནི་གཉིད་སད་ཙམ་ན་ཡིན་པས། དེའི་དུས་སུ་ཕྱི་ནང་གི་དངོས་པོ་ཐམས་ཅད་སྣང་ལ་རང་བཞིན་མེད་པས་སྒྱུ་མ་ལྟ་བུར་མོས་པ་བྱ་ཞིང་། མཉམ་བཞག་གཉིད་ཀྱི་དུས་སུ་གོང་བཞིན་དུ་བསྒོམས་པས་གོམས་པའི་སྟོབས་ཀྱིས་མཉམ་བཞག་དང་རྗེས་ཐོབ་འདྲེས་ནས་གཉིད་ལོག་མ་ལོག་མེད་པར་ལུས་སེམས་གཉིས་ཟིང་ཟིང་ལོང་ལོང་དུ་འོང་། སྣང་བ་བན་ནེ་བུན་ནེར་འཆར་བས་ཕྱི་ནང་གི་ཆོས་ཐམས་ཅད་རྨི་ལམ་ལྟ་བུའམ་སྒྱུ་མ་ལྟ་བུའི་བློ་སྐྱེ་གཏད་ཡལ་དུ་འགྲོ། ཆགས་སྡང་དང་རྨོངས་པའི་རྣམ་རྟོག་རང་ཤུགས་ཀྱིས་དག་ནས་དངོས་པོ་ལ་བདག་ཏུ་འཛིན་པའི་བློ་མི་སྐྱེ་བ་ཡིན་ནོ། །དེ་ཡང་གཉིད་མཐུག་པས་ཟིན་ན་གསང་གནས་སུ། སྲབ་པ་ལ་ཟིན་ན་མགྲིན་པའམ་སྨིན་བར་ཁོ་ན་བཟུང་ངོ་། །དེ་རྨི་ལམ་ལམ་དུ་བྱེད་པའི་མན་ངག་གོ །འཆི་ཁའི་ཤེས་པ་འོད་གསལ་དུ་འཆར་བར་བྱེད་པ་ལ། སྤྱིར་ཕྱག་རྒྱ་ཆེན་པོ་དང་། རྨི་ལམ་གྱི་རྩལ་
1-2-246a
༄༅། །འབྱོངས་པ་གཅིག་གིས་མངོན་དུ་གྱུར་ཏེ། དེ་ཡང་གནས་དང་སྤྱོད་ལམ་གོང་མ་ལྟར་ཉལ་ཏེ། རང་ཉིད་རྣལ་འབྱོར་མར་གསལ་བའི་ཐུགས་ཀར་ཉི་མའི་སྟེང་དུ་བཾ་དམར་ས་ལེ་བ་ལངས་པར་བསྒོམ༑ སྤྱི་བོར་བླ་མ་མོས་ལ། ད་ལྟ་ཉིད་དུ་འོད་གསལ་རྟོགས་པའི་གསོལ་བ་ལན་གསུམ་མམ་བདུན་བཏབ་པས་བཾ་ལ་བསྟིམ། དེ་ལས་འོད་ཟེར་དམར་པོ་བ་སྤུའི་བུ་ག་ན་ཕྱིར་འཕྲོས་པས་ཁམས་གསུམ་གྱི་སེམས་ཅན་ལ་ཕོག །སྡིག་སྒྲིབ་དག་ཅིང་རྣལ་འབྱོར་མར་ལམ་གྱིས་གྱུར་པར་བསམ་ལ། ངག་ཏུ་བཟླས་པ་ཅི་རིགས་པ་གཅིག་བྱ། གཉིད་འོང་བ་འདྲ་ན། ཕྱི་ནང་གི་ཆོས་ཐམས་ཅད་དང་རང་ཡང་འོད་དུ་ཞུ་ནས༑ འོད་གསལ་སྟོང་པ་ཉིད་དུ་བསྒོམ་ཞིང་གོམས་པར་བྱ་བའམ། སེམས་ཅན་ཐམས་ཅད་རྣལ་འབྱོར་མར་གྱུར་པ་དང་། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་དང་དཔའ་བོ་དང་རྣལ་འབྱོར་མ་ཐམས་ཅད་ཚུར་འདུས་ཏེ་བདག་ལ་ཐིམ་པའམ་བཾ་ལ་འདུས་པ་བཾ་ཡང་ཀླད་ཀོར། ཐིག་ལེ་ནཱ་ད་ཡང་མི་དམིགས་པའི་ངང་དུ་ལྷན་གྱིས་ཕྱག་རྒྱ་ཆེན་པོའི་ཉམས་ཐོག་ཏུ་ཕབ་ལ། ཚོད་རྨི་ལམ་གྱིས་བཟུང་ངོ་། །དེ་ཉིན་མཚན་རྒྱུན་ཆད་མེད་པར་བསྒོམ་ཞིང་གོམས་པར་བྱས་ནས། ནམ་འཆི་བའི་དུས་སུ་བསྒོམ་པའི་འོད་གསལ་དང་། རང་བཞིན་ནམ་ངོ་བོ་ཉིད་དུ་གནས་པའི་འོད་གསལ་འཕྲད་ནས་ཐ་དད་མེད་པར་
1-2-246b
གནས་པ་ནི་འོད་གསལ་ཆོས་སྐུ་སྟེ་དེ་ཁོ་ན་ཉིད་ལ་བར་དོར་སངས་རྒྱས་པ་ཞེས་བྱའོ། །དེའི་དུས་སུ་བསྒོམ་མཁན་གྱི་རིག་པའམ། ཡེ་ཤེས་དེ་རྒྱུན་ཆད་པར་མི་བཞེད་དེ། འོད་གསལ་སྟོང་ཉིད་དེ་ཉིད་དང་གཞན་དུ་བརྗོད་དུ་མེད་པའི་ཚུལ་དུ་གནས་པའོ། །དང་པོ་སྦྱོར་བའི་དུས་སུ་ཡང་ཕྱི་ནང་གི་ཆོས་ཐམས་ཅད་འོད་གསལ་དུ་མོས་པར་བྱས་ན་མཉམ་བཞག་གི་དུས་སུ་རྒྱུད་ལ་འོད་གསལ་འཆར་སླའོ། །དེ་ལྟར་མཉམ་རྗེས་ཡང་དང་ཡང་དུ་བསྒོམས་པ་ལས་འཆི་ཁ་མའི་ཤེས་པ་འོད་གསལ་དུ་ཤར་བ་དེ་ཆོས་སྐུ་ཡིན། ཕྱིས་གདུལ་བྱ་དག་པ་དང་མ་དག་པའི་བྱེ་བྲག་གིས་གཟུགས་སྐུ་གཉིས་སུ་བལྟ་སྟེ། དེ་ཡང་སྣང་ལ་རང་བཞིན་མེད་པ་འཇའ་ཚོན་ལྟ་བུའི་སྐུ་ཡལ་ནས་གདུལ་བྱའི་དོན་བྱེད་དོ། །དེ་ལྟ་བུ་བྱུང་ཙམ་ན་འགྲོ་བ་རིགས་དྲུག་གི་སྣང་བ་འགགས་ནས་འཁོར་བའི་འབྲེལ་ཐག་ཆོད་པ་ཡིན་ཏེ། འདི་ནི་གསང་སྔགས་ཀྱི་ལམ་ཁྱད་པར་ཅན་གྱི་གང་ཟག་སྣོད་ལྡན་གྱིས་ཉམས་སུ་བླང་བྱ་ཡིན་ནོ། །རྨི་ལམ་འོད་གསལ་གཉིས་ཀའི་གནད་དུ་དམ་ཚིག་དང་ལྡན་པ་བླ་མའི་མོས་གུས་གནད་ཀྱི་གདམས་པ་བསྒོམ་པའི་སྙིང་རུས་ཡོད་པ་དང་བཞི་པོ་དེ་གལ་ཆེ་གསུང་ངོ་། །རྣམ་ཤེས་འཕོ་བའི་གདམས་ངག་ནི། རང་ཉིད་རྡོ་རྗེ་རྣལ་འབྱོར་མའི་སྐུར་བསྒོམས་ནས་ལུས་ཀྱི་ནང་ཁོང་སྟོང་དུ་གནས་པ་རྩ་དབུ་མ་ཤིན་ཏུ་གསལ་བར་བྱས་ལ། ལྟེ་བར་
1-2-247a
༄༅། །ཆོས་འབྱུང་གི་དབུས་སུ་སེམས་ཀྱི་ངོ་བོ་བཾ་དམར་པོ་གཅིག་བསམ། སྤྱི་བོར་པད་ཉིའི་གདན་ལ་བླ་མའི་ངོ་བོ་རྣལ་འབྱོར་མ། ལྟེ་བར་ཆོས་འབྱུང་བཾ་དང་བཅས་པ་གཅིག་བསམ། དེ་ནས་རང་གི་འོག་སྒོ་བསྡམས་ལ་རྣམ་ཤེས་བཾ་ལས་ཐ་མི་དད་པར་ཡུན་རིང་དུ་དམིགས་པ་གཏད། དེ་ནས་རང་གི་ལྟེ་བའི་བཾ་དབུ་མ་ནས་བརྒྱུད་དེ་སྤྱི་བོའི་ཚངས་བུག་ནས་ཡར་འཐོན་ནས་དེར་བཞུགས་པའི་རྡོ་རྗེ་རྣལ་འབྱོར་མའི་ལྟེ་བའི་བཾ་ལ་ཐིམ། ཡང་མར་ལ་རང་གི་ལྟེ་བའི་བཾ་ལ་བསྡུ་ཞིང་བསྒོམ། དེ་ཡང་རླུང་འབྱུང་འཇུག་གཉིས་དང་བསྟུན་ནས་ཐུན་གསུམ་མམ། །བཞིའི་རིམ་པས་བསྒོམ་མོ། །ཐུན་འཇོག་པའི་དུས་སུ་རང་གི་ལྟེ་བར་བསྡུས་ལ་སྤྱོད་ལམ་བྱའོ། །དེ་ལྟར་ཡང་དང་ཡང་དུ་བསྒོམ་ཞིང་གོམས་པར་བྱས་ནས་ནམ་འཆི་བར་ངེས་པའི་རྟགས་རྫོགས་པར་བྱུང་བའི་དུས་སུ་སྔར་བཞིན་དུ་སྤྱི་བོར་བླ་མ་རྡོ་རྗེ་རྣལ་འབྱོར་མའི་རྣམ་པར་གསལ་བཏབ་ལ། ཕྱི་ནང་གསང་གསུམ་གྱི་མཆོད་པ་དང་། ལུས་ལོངས་སྤྱོད་དགེ་བའི་རྩ་བ་དང་བཅས་པ་མཆོད་པར་ཕུལ་ལ་གསོལ་བ་སིང་གིས་བཏབ་ལ་ནུས་ན་ཙོག་པུའམ། དཀྱིལ་ཀྲུང་བྱ། མ་གྲུབ་ན་སྔས་མཐོན་པོ་ལ་གཡས་རྟེན་དུ་བརྙེལ་ལ་ཉལ་བར་བྱས་ལ། རྣམ་ཤེས་ཀྱི་ངོ་བོ་རླུང་དང་བཅས་ཏེ་སྤྱི་བོའི་ཚངས་བུག་ནས་ཡར་རྒྱངས་ཀྱིས་བཏོན་ནས་ལྷ་མོའི་བཾ་ལ་བསྟིམ་ཞིང་། དེ་ལ་མ་གཡེངས་
1-2-247b
པར་ཤེས་པ་ཧྲིལ་གྱིས་གཞུག་གོ །དེ་ལ་མ་སོང་ན་བཾ་ལས་འོད་འཕྲོས་པའི་སྤྱི་རྡོ་རྗེ་རྣལ་འབྱོར་མའི་ལུས་ཀྱི་ནང་ཐམས་ཅད་དུ་ཕོག་པས་འོད་ཕུང་དུ་བསམ། འོད་ཕུང་དེ་ཡང་ལྟེ་བའི་བཾ་ལ་འདུས་ཏེ། ཟླ་ཚེས་དང་༑ ཐིག་ལེ་ནཱ་དའི་རྣམ་པར་ཙམ་མི་དམིགས་པའི་སྟོང་པ་ཉིད་དུ་གློད་པ་ནི་འོད་གསལ་གྱི་འཕོ་བ་ཞེས་བྱའོ། །དེ་ལ་ཁྱད་པར་དུ་ནད་ཀྱིས་བཙེར་ཞིང་འཆི་རྟགས་རྫོགས་པ་མ་རྟོགས་པ་བསམ་དུ་མི་རུང་བ་ཡིན༑ ཕལ་ཆེར་གོང་དུ་སྨོས་པ་ལས་སྐྱིལ་ཀྲུང་བཅས་ལ། ཀླད་པའི་ནང་དུ་རཾ་ལས་མེ་འབར་བས་བཞུས་ཏེ་ཀླད་པ་རྣམས་སྣ་བུག་གཉིས་ན་མར་སངས་ཀྱིས་བུད་པར་བསམ། དེའི་ཤུལ་དུ་ཧཱུྃ་གཅིག་ལ་དམིགས་པ་གཏད། སྤྱི་གཙུག་ཏུ་བླ་མའི་རྣལ་འབྱོར་བསམ། དེའི་ཐུགས་ཀ་ནས་བཾ་ལས་ཧཱུཾ་དེ་ཡང་ཡང་ཐིམ་པར་བསམ། སྐྱིལ་ཀྲུང་མ་ནུས་ན་ཁ་སྦུབ་ཉལ་ལ་སྦྱང་། དབུགས་འགྲོ་འགྲོ་འདྲ་ན་གཞོགས་གཡས་པ་ས་ལ་ཕབ་ལ་འགྲོའོ། །འཕོ་བའི་མན་ངག་གོ །རྣམ་ཤེས་གྲོང་དུ་འཇུག་པའི་སྒོ་ནས་འཕོ་བ་ནི། འདི་ལྟ་སྟེ། རང་རྣལ་འབྱོར་མར་གསལ་བའི་ཐུགས་ཀར་ཉི་མ་ལ་བཾ་དམར་པོ་གཅིག་བསམ། དེ་ལས་འོད་འཕྲོས་པས་བླ་མ་རྣལ་འབྱོར་མའི་རྣམ་པར་སྤྱན་དྲངས་ཏེ་མཆོད་པ་ཕུལ་ལ། དེའི་ཐུགས་ཀར་ཡང་ཉི་མ་ལ་བཾ་བསམ་ཞིང་རང་གི་སྙིང་གའི་བཾ་དེ་རྣམ་ཤེས་རླུང་དང་ཐ་མི་དད་པར་བསམ་ལ། རང་གི་
1-2-248a
༄༅། །སྣ་བུག་གཡས་ནས་ཞུགས་ནས། མདུན་གྱི་ལྷ་མོའི་སྣ་བུག་གཡོན་དུ་ཞུགས་ཏེ་ཐུགས་ཀའི་བཾ་ལ་ཐིམ་པར་བསམ། རླུང་ནང་དུ་འཇུག་ཙམ་ན་ལྷ་མོའི་གཡས་ནས་རང་གི་སྣ་བུག་གཡོན་དུ་ཞུགས༑ ཐུགས་ཀའི་ཉི་མའི་སྟེང་དུ་ཚུར་བསྡུས་ཏེ། དེ་ལྟར་ཕར་སྤྲོ་ཞིང་ཚུར་བསྡུས་པའི་རིམ་པས་ཐུན་བཞི་ལ་སོགས་པར་བསྒོམ་ལ། ནམ་འཆི་བར་ངེས་པའི་དུས་སུ་རྣམ་ཤེས་ཀྱི་ངོ་བོ་དེ་རླུང་ཕྱིར་འབྱུང་བ་དང་བསྟུན་ལ་མདུན་གྱི་རྡོ་རྗེ་རྣལ་འབྱོར་མའི་ཐུགས་ཀའི་བཾ་ལ་བསྟིམ་མོ། །དེ་ཡང་གོང་གི་སྦྱོར་བའི་དུས་སུ་ཐུན་མགོ་ལ་སྤྱན་དྲང་ཞིང་ཐུན་ཞབས་སུ་གཤེགས་སུ་གསོལ་བར་བྱའོ། །ཨྠྀི།། དཔལ་ལྡན་དྷརྨ་ཀཱིརྟིའི་སྙན་རྒྱུད་དེ་ཡན་ཆད་ཡི་གེ་མེད་ཐུགས་ཀྱི་ཉིང་ཁུ་འདི། དྷརྨ་ཤཱི་ལས་བདག་ལ་གནང་། ཤིན་ཏུ་གསང་བར་ང་བར་ཡང་ཡང་གདམས་པའོ།། །།
༄། །རྗེ་བཙུན་མ་ཞལ་གཅིག་མའི་ཉམས་སུ་བླང་བའི་རིམ་པ།
བླ་མ་ཆོས་རྗེ་རིན་པོ་ཆེ་ལ་ཕྱག་འཚལ་ལོ། །རྗེ་བཙུན་འདི་ཉམས་སུ་ལེན་པར་འདོད་པས། དུར་ཁྲོད་ལ་སོགས་པ་ཤིན་ཏུ་དབེན་པའི་གནས་སུ། །སྟན་འཇམ་པོ་འབོལ་བ་ནང་ཚངས་ཅན་གྱི་སྟེང་དུ་ཞབས་རྡོ་རྗེ་སྐྱིལ་ཀྲུང་དུ་འདུག་པ། མཎྜལ་དང་། མཆོད་པ་དང་། གཏོར་མ་དང་། ཆང་ཕུད་དང་། ཐང་སྐུ་དང་། ཌཱ་མ་རུ་རྣམས་བཤམས་ལ། དེ་ནས་སེམས་བསྐྱེད་པར་བྱ་སྟེ། བདག་དང་ཁམས་གསུམ་གྱི་སེམས་ཅན་ཐམས་ཅད་རྗེ་བཙུན་མའི་གོ་འཕང་ཐོབ་པར་བྱའོ་སྙམ་
1-2-248b
དུ་སེམས་བསྐྱེད་པར་བྱའོ། །དེ་ནས་རང་ཉིད་ཐ་མལ་པའི་སྙིང་ཁར་བམ་དམར་པོ་ལས་པདྨ་འདབ་མ་བཞི་པ། དེའི་དབུས་སུ་ཉི་མའི་དཀྱིལ་འཁོར་གྱི་སྟེང་དུ་ཡི་གེ་བཾ་དམར་པོ་གཅིག་བསམ། བཾ་ལས་འོད་ཟེར་འཕྲོས་པས་སེམས་ཅན་ཐམས་ཅད་ཀྱི་སྡིག་སྒྲིབ་དག་ནས་ཐམས་ཅད་རྣལ་འབྱོར་མར་གྱུར། འོད་ཟེར་ཚུར་འདུས་པ་སྙིང་ཁའི་བཾ་ལ་ཐིམ། ཡང་བཾ་ལས་འོད་ཟེར་འཕྲོས་པས་བདག་གི་ཤ་ཁྲག་གི་ཕུང་པོ་དང་སྡིག་སྒྲིབ་བསྲེགས་ནས། འོད་ཕུང་དམར་པོ་བཾ་གིས་མཚན་པ་གཅིག་ཏུ་འགྱུར། བཾ་དང་འོད་ཕུང་ལས་སྐད་ཅིག་གིས་བདག་ཉིད་རྗེ་བཙུན་རྣལ་འབྱོར་མ་སྐུ་མདོག་སིན་དྷུ་ར་ལྟར་དམར་བ། ཞལ་གཅིག་པ་ཕྱག་གཉིས་པ། གཅེར་བུ་ལང་ཚོ་དང་ལྡན་པ། སྤྱན་གསུམ་པ། དབུ་སྐྲ་གྲོལ་ཞིང་འཁྱིལ་བ། ཞལ་མཆེ་བ་གཙིགས་པ། སྤྱི་གཙུག་ཏུ་རུས་པའི་འཁོར་ལོ་དང་། རྣ་ཆ་དང་། མགུལ་རྒྱན་དང་། ཕྱག་གདུབ་དང་༑ སྐ་རགས་ཀྱིས་བརྒྱན་པ། དཔྲལ་བའི་སྟེང་ན་ཐོད་པ་སྐམ་པོ་ལྔའི་ཟེའུ་ཕྲོམ་དང་། ཐོད་པ་རློན་པ་ལྔ་བཅུའི་དོ་ཤལ་ཅན། ཕྱག་གཡས་པས་གྲི་གུག་བསྣམས་པ། གཡོན་ཐོད་པ་ཁྲག་གིས་བཀང་བ་བསྣམས་པ། མཆན་ཁུང་ན་ཁ་ཊྭཱཾ་ག་བསྣམས་ཤིང་དར་སྣ་ལྔས་བརྒྱན་པ། བཅུ་དྲུག་མ་ལྟ་བུའི་ན་ཚོད་ཅན། སྐུ་ཤིན་ཏུ་རྒྱས་པ། པདྨ་དང་ཉི་མ་དང་རོའི་གདན་ལ་གཡོན་བརྐྱང་བས་རོའི་སྙིང་གར་བརྫིས་པ། 
1-2-249a
༄༅། །ཞབས་གཡས་པ་བསྐུམ་པའི་མཐེ་བོང་གིས་གཡོན་པའི་བརླའི་དཀྱིལ་དུ་གཏད་པ། བསྐལ་པའི་མེ་དཔུང་འབར་བའི་དབུས་ན་བཞུགས་པར་བསམ། དེ་ཡང་ཇི་སྲིད་མི་སྐྱོའི་བར་དུ་གསལ་བར་བསྒོམ་མོ། །དེ་ནི་བསྐྱེད་པའི་རིམ་པའོ། །དེ་ནས་རྫོགས་པའི་རིམ་པ་བསྒོམ་པ་ནི། བདག་གི་སྤྱི་བོ་ཚངས་པའི་བུ་ག་དང་གསང་གནས་ཀྱི་བར་དུ་རྩ་ཨ་བ་དྷཱུ་ཏཱིའི་ཡར་སྣ་སྤྱི་བོ་ལ་ཐུག་པ། མར་སྣ་གསང་གནས་སུ་ཐུག་པ། ལྟེ་བའི་ཐད་སོར་ཆོས་འབྱུང་ཁ་དོག་དམར་པོ་གྲུ་གསུམ་པར་འདུག་པ། དེའི་སྟེང་དུ་པདྨ་དམར་པོ་འདབ་མ་བཞི་པ་གཅིག་བསམ། དེའི་ལྟེ་བོར་ཉི་མའི་དཀྱིལ་འཁོར་གྱི་སྟེང་དུ་བཾ་དམར་པོ་གཅིག་བསམ། འདབ་མ་བཞི་ལ་ཧ་རི་ནི་ས་བཞི་བསམ། ཡི་གེ་དེ་ཡང་ཁ་དོག་དམར་པོ་རེག་བྱ་ཚ་བ་ཤིན་ཏུ་གསལ་བར་བསྒོམ་མོ། །དེ་ནས་དབུགས་དེ་ལན་གསུམ་ཕར་བུས་ལ། དེ་ནས་ཚུར་ལ་ན་ར་ར་དྲངས་ལ། དེ་ནས་འོག་རླུང་དྲང་ཞིང་། སྟེང་རླུང་དྲག་ཏུ་མནན་ཞིང་བསྒོམ་པར་བྱའོ། །ཆོས་འབྱུང་མི་འཁོར། བཾ་མི་འཁོར། པདྨ་དང་ཡི་གེ་བཞི་འཁོར་བའོ། །དེ་ན་ཡང་གཡོན་དུ་དམར་སྒ་ར་ར་འཁོར་བར་བསམ་མོ། །དེ་ཡང་ཇི་སྲིད་མི་སྐྱོ་བར་དུ་བསྒོམ་པར་བྱའོ། །དེ་ལ་བརྟེན་ཏེ་ལུས་ཀྱི་དྲོད་འབྱུང་། དྲོད་ལ་བརྟེན་ནས་བདེ་བ་སྐྱེ། དེ་ལ་བརྟེན་ནས་མི་རྟོག་པ་འབྱུང་། མི་རྟོག་པ་ལ་གོམས་ནས་ཕྱག་རྒྱ་ཆེན་པོ་
1-2-249b
ཤུགས་ཀྱིས་འཆར། དེ་ནི་རྫོགས་པའི་རིམ་པའོ། །དེ་ནས་བཟླས་པ་བྱ་བ་ནི། རང་གི་སྙིང་གར་པདྨ་དམར་པོ་འདབ་མ་བཞི་པ། དེའི་ལྟེ་བ་ལ་ཉི་མའི་དཀྱིལ་འཁོར་རོ། །དེའི་སྟེང་དུ་ཨེ་སེར་པོའི་སྟེང་དུ་བཾ་དམར་པོ། དེའི་མཐའ་མ་ལ་སྔགས་ཀྱིས་གཡོན་དུ་དམར་སྒོར་རེ་འཁོར་བར་བསམ་ལ་བཟླས་པ་བྱ། ཨོཾ་བཛྲ་བཻ་རོ་ཙ་ནི་ཡེ་ཧཱུྃ་ཕཊ་སྭཱ་ཧཱ། དེ་ཇི་སྲིད་མི་སྐྱོའི་བར་དུ་བཟླས་པ་བྱའོ། །དེ་ནས་གཏོར་མ་འབུལ་བ་ནི༑ ཀ་པཱ་ལའི་ནང་དུ་ཤ་ལྔ་བདུད་རྩི་ལྔས་བཀང་ལ་ཆང་ཕུད་བླུག་ལ་མ་འཇིའི་སྟེང་དུ་བཞག །དེ་མི་དམིགས་པ་ལས་ཐོད་པའི་སྒྱེད་པུ་རི་རབ་ཙམ་བསམ། དེའི་སྟེང་དུ་ཀ་པཱ་ལ་ཕྱི་དཀར་ལ་ནང་དམར་བ་ཡངས་ཤིང་རྒྱ་ཆེ་བ། ནང་དུ་ཤ་ལྔ་བདུད་རྩི་ལྔས་ཕྱུར་གྱིས་གང་བར་བསམ། དེའི་སྟེང་དུ་ཨོཾ་དཀར་པོ་དང་། ཨཱཿདམར་པོ། ཧཱུཾ་སྔོན་པོ་གསལ་བར་བསྒོམ། ངག་ཏུ། ཨོཾ་ཨཱཿཧཱུྃ་ཞེས་ལན་གསུམ་བརྗོད་ཅིང་། ལག་པ་འབར་བའི་ཕྱག་རྒྱ་བཅས་ལ་སྨིན་མཚམས་སུ་བསྐོར་བར་བྱ། ཧཱུྃ་ལས་བདུད་རྩི་སྔོན་པོ་བབ་པས་གཏོར་མ་སྔོ་ལྟེམས་ཀྱིས་སོང་བར་བསམ། ཨཱཿལས་བདུད་རྩི་དམར་པོ་བབ་པས་དམར་ལྟེམས་ཀྱིས་སོང་བར་བསམ། ཨོཾ་ལས་བདུད་རྩི་དཀར་པོ་བབ་པས་དཀར་ལྟེམས་ཀྱིས་སོང་བར་བསམ། ཡི་གེ་གསུམ་ཡང་འོད་དུ་ཞུ་ནས་གཏོར་མར་ཐིམ་པས་རོ་མཆོག་བརྒྱ་དང་ལྡན་པར་བསམ་མོ། །དེ་ནས་བདག་གི་
1-2-250a
༄༅། །ཐུགས་ཀར་བཾ་ལས་འོད་ཟེར་འཕྲོས་པས་ཨུ་རྒྱན་གྱི་གནས་ནས་རྗེ་བཙུན་མ་དཔག་ཏུ་མེད་པ་བྱོན་ནས་གཏོར་མའི་མཐའ་མར་བསྐོར་ནས་བཞུགས་པར་བསམ། དེ་ཡང་གཙོ་བོ་ནི་རྗེ་བཙུན་མ། གཞན་རྣམས་ནི་བཀའ་རྒྱུད་ཀྱི་བླ་མ་རྣམས་བསམ། ཨོཾ་བཛྲ་བཻ་རོ་ཙ་ནི་ཡེ་ཧཱུྃ་ཕཊ་སྭཱ་ཧཱ། བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་ལན་གསུམ་མམ་བདུན་བརྗོད་པས། ལྗགས་རྡོ་རྗེ་སྦུ་གུ་ལ་གསོལ་བ། ཤིན་ཏུ་དགྱེས་པའི་གད་མོ་བཅུ་གཉིས་སྒྲོག་པར་བསམ། དེ་ནས་ཌཱ་མ་རུ་བཀྲོལ། བསྟོད་པ་བྱ། འདོད་པའི་དོན་ལ་གསོལ་བ་གདབ། ཡི་གེ་བརྒྱ་པས་བཟོད་པར་གསོལ། དགེ་བའི་རྩ་བ་སེམས་ཅན་གྱི་དོན་དུ་བསྔོ། གཏོར་མ་གཙང་སར་དབུལ། རང་ཉིད་རྗེ་བཙུན་མའི་ང་རྒྱལ་གྱི་སྤྱོད་ལམ་ཐམས་ཅད་བྱའོ། །དེ་ནི་གཏོར་མའི་རིམ་པའོ། །བླ་མ་རིན་པོ་ཆེའི་ཞལ་ནས་གསུངས་པའི་རྗེ་བཙུན་མ་ཞལ་གཅིག་མའི་ཉམས་སུ་བླང་བའི་རིམ་པའོ། །རཏྣ་དྷརྨ་ཀཱིརྟིས་ཆོས་རྗེ་རིན་པོ་ཆེ་མཁས་པ་ལ་ཀརྨ་ཡང་དགོན་དུ་གནང་བའོ།། །།ན་མོ་གུ་རུ། དང་པོ་ཉལ་བའི་རྣལ་འབྱོར་ནི། གནས་དུར་ཁྲོད་ཀྱི་གཞལ་ཡས་ཁང་དུ་བསམ། གདན་སེང་གེའི་ཁྲི་རཏྣས་སྤྲས་པའི་སྟེང་དུ་བདག་ལྷ་མོའི་སྐུ་རྒྱན་དང་ཕྱག་མཚན་མེད་པ་སེང་གེའི་ཉལ་ཐབས་སུ་བསམ། བླ་མ་ནམ་མཁའ་ལ་བཞུགས་པ་ལ་ཕྱག་མཆོད་བྱ། གསོལ་བ་གདབ། རང་ལ་
1-2-250b
བསྟིམ་ཞིང་སྙིང་གའི་མ་ལས་འོད་ཟེར་ཕྱོགས་བཅུར་འཕྲོས། སེམས་ཅན་ཐམས་ཅད་ལ་ཕོག་པས་རྣལ་འབྱོར་མར་བྱས། འོད་ཚུར་འདུས་ནས་རང་ལ་བསྡུས། ལུས་ཀྱང་སྙིང་གའི་ས་བོན་བཾ་ལ་བསྡུ། བཾ་ཡང་ས་ཡལ་ནས་ཆོས་ཉིད་སྟོང་པའི་ངང་དུ་གཉིད་ལོག །རྨི་ལམ་ལ་འཁྲུལ་པ་བྱུང་ན་སྐྱེ་མེད་དུ་ངོ་སྤྲད་དོ། །ལྡང་བའི་རྣལ་འབྱོར་ནི། གཉིད་སད་པ་དང་བསམ་གྱིས་མི་ཁྱབ་པའི་ངང་ལ་ནམ་མཁའ་ལ་རྗེ་བཙུན་མ་ཌཱ་མ་རུ་དང་རྩ་སྔགས་ཀྱི་སྒྲ་བྱུང་པས་རྐྱེན་བྱས་ཆུ་ལ་ཉ་འཕར་བ་ལྟར། ལྷ་མོའི་སྐུར་ལངས་ལ་ཐུན་ལ་འཇུག་གོ །བསམ་གྱིས་མི་ཁྱབ་པའི་རྣལ་འབྱོར་ནི། རང་ལྷར་གནས་པའི་སྙིང་གར་བཾ་གི་འོད་ཟེར་དཔག་ཏུ་མེད་པ་བ་སྤུའི་བུ་ག་དང་སྒོ་ཀུན་དང་ཕྱོགས་བཅུར་སྤྲོས་པས་སྣོད་དག་པ་གཞལ་ཡས་ཁང་བཅུད་རྣམས་ལྷ་མོར་གསལ་བ་ལ་དེ་རྣམས་ཀྱང་འོད་དུ་གྱུར་ཏེ། རང་ལུས་ལྷར་གསལ་བར་བསྡུ། རང་ལྷར་གནས་པ་ཡང་འོད་དུ་གྱུར་དེ་བ་ལ་བསྡུ། བཾ་ཡང་རིམ་གྱིས་ནམ་མཁའ་ལ་སྤྲིན་དེངས་པ་ལྟར་ཡལ་ནས་ཆོས་ཐམས་ཅད་བསམ་གྱིས་མི་ཁྱབ་པའི་ངང་ལ་མ་ཡེངས་པར་ཀློད་ལ་གསལ་ལ་རྟོག་པ་མེད་པའི་ངང་དུ་བཞག་གོ །བདེ་བ་ཤས་ཆེ་ན་སྟོང་པ་འབའ་ཞིག་བསྒོམ་མོ། །ཐུན་མཚམས་སུ་སྤྱོད་ལམ་གྱི་རྣལ་འབྱོར་ནི། ཆོས་སྐུའི་ངང་ལ་གཟུགས་སྐུ་བྱུང་བ་ལྟར་བསམ་གྱིས་མི་ཁྱབ་པའི་ངང་ལས་སྐད་ཅིག་
1-2-251a
༄༅། །གིས་རང་ལྷ་སྐུ་སྒྱུ་མ་ལྟ་བུར་ལངས་པ་ལ། བསྔོ་བ་དང་སྨོན་ལམ་གདབ། བདག་དང་སྣང་བའི་དངོས་པོ་ཐམས་ཅད་ལྷ་དང་གཞལ་ཡས་ཁང་སྒྱུ་མ་ལྟ་བུར་འཇོག་པའི་ངང་ལས་ལུས་ཀྱི་སྒུལ་སྤྱོད་ཐམས་ཅད་ཕྱག་རྒྱ། ངག་གི་སྨྲ་བརྗོད་ཐམས་ཅད་སྔགས། སེམས་ཀྱི་རྟོག་པ་ཐམས་ཅད་ཟུང་འཇུག་ཏིང་ངེ་འཛིན་དུ་ཤེས་པས་ཆུ་བོའི་རྒྱུན་བཞིན་དུ་གནས་པར་བྱའོ། །འགྲོ་བའི་དུས་སུ་རང་ལྷར་བསམ། ལྷ་མོ་བཞི་ཡིས་བསྐོར་བར་བསམ། སླེབ་པ་དང་ཆོས་ཉིད་ཀྱི་ངང་དུ་བཞག་གོ །བླ་མའི་རྣལ་འབྱོར་རྩ་བའི་བླ་མ་བསམ། བླ་མ་གཞན་ཐམས་ཅད་དེ་ལ་བསྟིམ། དུས་གསུམ་སངས་རྒྱས་ཐམས་ཅད་ཀྱི་རང་བཞིན་དུ་ཤེས་པར་བྱས་ལ། དད་གུས་དྲག་པོ་བྱ། གསོལ་བ་བཏབ། ཟས་ཀྱི་རྣལ་འབྱོར་ཀྱང་བྱའོ། །ཚད་མེད་པའི་རྣལ་འབྱོར་ནི། བདག་གིས་སེམས་ཅན་ཐམས་ཅད་སྲིད་པའི་དུཿཁ་རྒྱ་མཚོ་ལས་བསྒྲལ་ལ། བླ་ན་མེད་པའི་བྱང་ཆུབ་ཀྱི་བདེ་བ་ལ་དགོད་དོ་སྙམ་དུ་བསམ་ཞིང་། སེམས་ཅན་ཐམས་ཅད་བདག་གི་སྙིང་གི་དཀྱིལ་དུ་གཞུག་པར་བགྱིའོ།། །།
༄། །ཚ་ཚ་འདེབས་པ།
ན་མོ་གུ་རུ། ཚ་ཚ་འདེབས་པར་འདོད་པས། རང་ཉིད་ཞལ་གཅིག་མར་བསྒོམ། སྤྱི་བོར་བླ་མ་བསྒོམ། སྙིང་པོ་བགྲང་ཞིང་ས་རྐོ་བ་དང་། བརྡུང་བ་དང་། འདག་ས་མི་དམིགས་པ་ལས་བཾ་དུ་བསམ། བཾ་ལས་འོད་ཟེར་འཕྲོས་པས་རང་བཞིན་གྱི་གནས་ནས་རཏྣ་དཔག་ཏུ་
1-2-251b
མེད་པ་སྤྱན་དྲངས་རྒྱས་ལ་བསྟིམ་མོ། །དེ་ནས་སྐོལ་ཕོར་མི་དམིགས་པ་ལས་ནང་དུ་བཾ་བསམ། འབི་འབི་བྱས་ལ་དེ་བཅུག་ལ་ཚ་ཚ་གདབ། དེ་ནས་མར་བྱོན་པའི་དུས་སུ་རྗེ་བཙུན་མར་བསམ། སྐུ་གསུང་ཐུགས་ཀྱི་རབ་གནས་བྱ། འབི་འབི་ཆོས་སྐུ། ནང་དུ་བཅུག་པ་ལོངས་སྐུ། མར་བྱོན་པ་སྤྲུལ་སྐུའོ། །ཚ་ཚའི་མན་ངག་གོ། །ན་མོ་གུ་རུ། ཞལ་གཅིག་མའི་བསྐོར་བ་བྱེད་པར་འདོད་པས། འབུམ་པ་ལ་སོགས་པ་རྟེན་རིན་པོ་ཆེའི་གཞལ་ཡས་ཁང་གི་ནང་དུ། ཞལ་གཅིག་མ་གཙོ་འཁོར་ལྔས་གཙོ་བྱས་པའི་དཔའ་བོ་དང་དཔའ་མོ་དང་བླ་མ་དང་སངས་རྒྱས་དང་བྱང་ཆུབ་སེམས་དཔའི་དཔག་ཏུ་མེད་པ་བཞུགས་པར་བསམ་ལ་ཡན་ལག་བདུན་པ་རྒྱས་པ་གཅིག་བྱ། དེ་རྣམས་ཀྱི་སྐུ་ལས་འོད་ཟེར་ཁ་དོག་རྣམ་པ་ལྔ་དཔག་ཏུ་མེད་པ་བྱུང་པས་བདག་གི་ལུས་ངག་ཡིད་གསུམ་ལ་ཐིམ་པས་སྡིག་པ་ཐམས་ཅད་དག་པར་བསམ་ཞིང་བསྐོར་བ་བྱའོ། །བསྐོར་བའི་མན་ངག་གོ །བླ་མ་དམ་པ་རྣམས་ལ་ཕྱག་འཚལ་ལོ། །རི་ཁྲོད་དམ་ཁང་སྟོང་འདྲེ་ཅན་དུ་འདུག་ན། རང་ཉིད་རྗེ་བཙུན་མར་བསྒོམ། སྤྱི་བོར་བཀའ་རྒྱུད་ཀྱི་བླ་མ་སངས་རྒྱས་དང་བྱང་ཆུབ་སེམས་དཔའ་ལ་སོགས་པ་བསམ། དཔྲལ་བར་རྗེ་བཙུན་དྷརྨ་ཀཱིརྟི་ཕྱག་གཡས་ཌཱ་མ་རུའི་སྒྲ་སྒྲོག་པ། མི་མ་ཡིན་ཐམས་ཅད་དབང་དུ་བསྡུད་པ། ཕྱག་གཡོན་པ་སྡིགས་མཛུབ་མཛད་
1-2-252a
༄༅། །པ། རུས་པའི་རྒྱན་དང་གར་གྱི་ཚུལ་གྱིས་བཞུགས་པ། གཞལ་ཡས་ཁང་བུ་ག་ཐམས་ཅད་ཌཱ་ཀི་མས་ཐཾ་འགགས་ནམ་འགགས་སུ་བསམ། བླ་མ་དང་རྗེ་བཙུན་མ་དང་རང་གི་ཐུགས་ཀ་ནས་འོད་ཟེར་བྱུང་ནས་མི་མ་ཡིན་པ་ཐམས་ཅད་བསྲེགས་པར་བསམ། འདུག་ས་ཐམས་ཅད་མེའི་རང་བཞིན་གྱི་གུར་ཁང་དུ་བསམ། གནོད་པ་གང་གིས་ཀྱང་ཚུགས་པ་མེད་པར་མེ་དང་ཌཱ་ཀི་མའི་རང་བཞིན་དུ་བསྒོམ། བླ་མ་ལ་གསོལ་བ་གདབ། རི་ཁྲོད་གཉན་པོ་ལ་སོགས་པར་འདུག་པའི་དུས་སུ་བྱའོ། །ཕྱིའི་གཏོར་མ། ནང་གི་གཏོར་མ། གསང་བའི་གཏོར་མ། བླ་ན་མེད་པའི་གཏོར་མ་དང་བཞི་ལས། ཕྱིའི་གཏོར་མ་ལ་གཉིས་ལས། དང་པོ་རང་གི་མདུན་དུ་ཅི་འབྱོར་པའི་གཏོར་མ་བཤམས་ལ་ཡི་གེ་གསུམ་གྱིས་བྱིན་གྱིས་བརླབས་ལ། དེ་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་བབས་ནས་མགྲོན་མན་ངག་གིས་སྤྱན་དྲངས་ནས་འབུལ་བ་དེ་ཕྱིའི་ནང་ངོ་། ཁ་འབར་མ་དང་ཆུ་གཏོར་ལ་སོགས་པ་དེ་ཕྱིའི་ཕྱིའོ། །ནང་གི་གཏོར་མ་ལ་གཉིས་ལས། ནང་གི་ཕྱིའི་གཏོར་མ་ནི། ནང་གི་གཏོར་མ་འདི་ཡིན་ནོ། །ནང་གི་ནང་གི་གཏོར་མ་ནི། རྩ་གསུམ་ཙཀྲ་བཞི་ལ་གནས་པའི་དཔའ་བོ་དང་ཌཱ་ཀི་ལ་སོགས་པ་ཁ་ཟས་བདུད་རྩི་བྱིན་གྱིས་བརླབས་ནས་འབུལ་བ་ཡིན་ནོ། །གསང་བའི་གཏོར་མ་ནི། ལྟེ་བར་གཏུམ་མོའི་མེ་སྦར་ནས་རྩ་
1-2-252b
གསུམ་གྱི་སྦྱོར་བས་བདེ་བ་བསྐྱེད་པ་གསང་བའོ། །གསང་བ་བླ་ན་མེད་པའི་གཏོར་མ་ནི། རྩ་གསུམ་གྱི་སྦྱོར་བ་ཡེ་ཤེས་ཀྱི་རླུང་དབུ་མར་ཚུད་ནས་ཆོས་སྐུ་ལྷང་གིས་རྟོགས་པ་ནི་གསང་བ་བླ་ན་མེད་པའི་གཏོར་མའོ།། །།
༄། །ཞལ་གཅིག་མའི་དུས་རྒྱུན་གྱི་བསྙེན་པ།
ཞལ་གཅིག་མའི་དུས་རྒྱུན་གྱི་བསྙེན་པ་བྱེད་པར་འདོད་ན། རང་ཉིད་རྣལ་འབྱོར་མར་གསལ་བའི་མདུན་དུ་ཆོས་འབྱུང་རྐྱང་པའི་ནང་དུ་པདྨ་དང་ཉི་མའི་སྟེང་དུ་བཾ་ལས་འོད་འཕྲོས་པས་སེམས་ཅན་ཐམས་ཅད་ཀྱི་སྡིག་སྒྲིབ་དག་ནས་རྣལ་འབྱོར་མར་གྱུར། ཚུར་འོད་ཟེར་འདུས་བཾ་ལ་ཐིམ་པས་རྣལ་འབྱོར་མ་ཇི་ལྟ་བ་བཞིན་དུ་བསྐྱེད། སྐུ་གསུང་ཐུགས་བྱིན་གྱིས་རླབས། ཡེ་ཤེས་པ་སྤྱན་དྲངས་ལ་བསྟིམ༑ རང་དང་མདུན་གྱི་གཉིས་ཀའི་ཐུགས་ཀར་པད་ཉིའི་སྟེང་དུ་བཾ་ལ་སྔགས་ཀྱིས་བསྐོར་བར་བསམ། མདུན་གྱི་རྣལ་འབྱོར་མའི་སྔགས་ལས་འོད་ཟེར་བྱུང་ཞལ་ནས་རང་གི་སྤྱི་བོར་ཐིམ་པས་ལུས་ཀྱི་སྡིག་པ་དག །མགྲིན་པར་སླེབ་པས་ངག་གི་སྡིག་པ་དག །སྙིང་གར་སླེབ་པས་ཡིད་ཀྱི་སྡིག་པ་དག་ནས་བྷ་གར་ཞུགས་ནས་འཁོར་བར་བསམ་ཞིང་བཟླས་པ་བྱའོ། །འདི་ནི་གཞུའི་བྲ་མ་གྲུ་བཞི་རུ་དུས་གསུམ་མཁྱེན་པ་ལ་ཞལ་གདམས་མངོན་སུམ་དུ་གནང་བའོ། །གངས་དཀར་བ་རང་ཐ་མལ་དུ་བཞེད་དོ། །དབང་རྡོ་རྗེ། རང་རྣལ་འབྱོར་མར་བཞེད་དོ། །རྡོ་རྗེ་རྣལ་འབྱོར་མ་ལ་ཕྱག་འཚལ་ལོ། །སྡིག་པ་སྦྱངས་བའི་
1-2-253a
༄༅། །ཕྱིར་རྒྱུན་དུ་བཟླས་པ་བྱེད་ན། སེམས་ཅན་ཐམས་ཅད་ཀྱི་དོན་དུ་བདག་གིས་རྡོ་རྗེ་རྣལ་འབྱོར་མའི་གོ་འཕང་ཐོབ་པར་བྱ་སྙམ་དུ་སེམས་བསྐྱེད་ལ། རང་ཉིད་སྐད་ཅིག་གིས་ཇོ་མོར་བསྒོམ་པའི་མདུན་དུ་ཆོས་འབྱུང་གི་ནང་དུ་པད་ཉིའི་སྟེང་དུ་བཾ་ལས་འོད་ཟེར་འཕྲོས་པས་སེམས་ཅན་ཐམས་ལ་ཕོག །སྡིག་སྒྲིབ་སྦྱངས་ནས་འོད་ཟེར་བཾ་ལ་ཐིམ། བཾ་ལས་རྡོ་རྗེ་རྣལ་འབྱོར་མ་སྒྲུབ་ཐབས་ནས་འབྱུང་བ་ལྟར་བསྐྱེད་ལ། རྣལ་འབྱོར་མ་དེའི་ཐུགས་ཀར་པད་ཉིའི་སྟེང་དུ་བཾ་བསམ། བཾ་ལས་འོད་ཟེར་བྱུང་བས་བདག་གི་ལུས་ངག་ཡིད་གསུམ་གྱི་སྡིག་སྒྲིབ་སྦྱངས། བདག་རྣལ་འབྱོར་མར་འདུག་པའི་ཐུགས་ཀ་ནས་པད་མ་དང་ཉི་མའི་སྟེང་གི་བཾ་ལས་འོད་ཟེར་འཕྲོས་པས་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས་པར་བསམ་ཞིང་། སྙིང་པོ་བཟླས་པས་སྡིག་སྒྲིབ་བྱང་བར་འགྱུར་རོ། །འཇོག་ཙ་ན། མདུན་གྱི་ལྷ་མི་དམིགས་པར་རང་ལ་བསྡུའོ། །རྡོ་རྗེ་རྣལ་འབྱོར་མའི་སྡིག་པ་སྦྱོང་བའི་ཆོ་ག །རྗེ་བཙུན་བླ་མ་རིན་པོ་ཆེའི་ཞལ་གྱི་གདམས་པ་རྫོགས་སོ།། །།

